Contribucion di Gobierno na fondo di AZV tabata hopi mas abao durante 2021

ORANJESTAD (AAN): Diahuebs mainta durante conferencia di prensa ofreci pa Organo Ehecutivo di AZV na nan sede,

e director ing. Edwin Jacobs a mustra cu ademas di e Prima di AZV (via salario), y tambe e impuesto di BAZV (haciendo compras), tin di corda cu tin e Contribucion di Pais tambe (‘landsbijdrage’) tambe na e fondo aki.

   Ora AZV tin su gasto, y di esey ta kita loke a haya di Prima, y tambe loke a haya di BAZV, si ainda tin gasto cu no a wordo cubri, esey e ora ta ser haci cu un contribucion di Gobierno.

   E relato anual ta splica cu na 2019, Gobierno no mester a duna nada di Landsbijdrage.  Pero na 2020, Gobierno mester a duna 99.7 miyon Florin den e fondo, y e.o. esakinan ta loke Gobierno a ricibi via sosten di liquidez di Hulanda pa por a cubri e deficit aki cu a keda den e fondo.

   Na 2021 e landsbijdrage a reduci!  Na comienzo tabata premira cu e lo bay tin mester di 56 miyon Florin di Gobierno, pero na final debi na crecimento acelera, e contribucion di Aruba a keda limita na solamente 33.9 miyon Florin.

   Jacobs a bisa cu tin di keda conciente cu e gastonan kizas por a baha cu 1.2 miyon Florin, y no pasobra tabatin consumo, pero pasobra a tuma den cuadro di e acuerdo entre Aruba y Hulanda e recorte di 60 miyon, a tuma medida pa reduci gasto tambe aña pasa.

   Na 2020 a logra 35 miyon, y na 2021 no a logra e 60 miyon di recorte, y a keda pega na 36.7 miyon Florin.  Un gran parti cu AZV a ricibi ta reduccion na tarifanan y presupuesto, y a reduci cu 5.5% e tarifa y presupuestonan, y pesey AZV ta agradecido na nan.  Ta mira tambe cu tin limitacionnan pafo di pakete di AZV, esta e contribucion propio pa viahamento como acompañante, pero tambe reduccion den e placa pa dia cu asegurado ta haya ora e ta den exterior.

   Tambe dado momento como cu Colombia a lockdown, no por a manda pashentnan mas eynan pa cuido.