Contratista a coopera cu automobilistanan y a prefera haci trabao dificil riba Diadomingo

ORANJESTAD (AAN): E trabao di coba buraco den acera den De La Sallestraat na Playa, lo tabata uno cu yen dolor di cabez si acaso esey a wordo haci durante siman.

   Pesey mes, un palabra di pabien ta bay na e Contratista aki, cu a dicidi na coba y haci e trabao di utilidad aki, riba un Diadomingo ora cu trafico ta hopi trankil.

   Debi na esey, a cera trafico pa un solo direccion so na altura di La Salle College MAVO na Playa.  Esey a habri caminda pa asina e trahadornan di e Contratista por a haci e trabao cu mas enfoque, sin cu nan a trece trafico na peligro.

   Un habitante cu a mira esaki, a yama DIARIO pa raporta cu e ta completamente di acuerdo cu e pensamento aki di cera caminda ora cu tin menos trafico.  El a bisa cu Diadomingo casi De La Sallestraat ta ‘morto’, pues tabata e momento ideal pa a haci e trabao di haci instalacion bao di acera.

   Y el a keda asombra pa mira con rapido e Contratista su trahadornan, y operadornan di Bobcat Tractors traha asina eficiente, y cu minimo molester pa habitantenan.

   Na su opinion, e Contratista di Watty Vos Boulevard tin di siña di esaki, pasobra no por ta cu net den oranan piek di merdia, ta dicidi na cera un pida via chikito causando un stagnamento increible di trafico.