Container cu diferente material deportivo pa scolnan a yega Aruba for di Hulanda

ORANJESTAD (AAN):  Dialuna mainta un container a yega carga cu diferente material deportivo  di segunda mano, pero den bon condicion. 

Minister di Deporte, Endy Croes tabata presente na e sitio, esta ex edificio di EMCO.

            El a laga sa cu na Hulanda, e Stichting Sports for Children  a pone e articulonan aki den un container y den nan contacto estrecho di Fundacion Sport for Youth ta organisa tur cos aki pa e material wordo treci Aruba.

            Nan tin un lista caba y ya caba dialuna a bay EPB unda tin un order haci pa entrega un par di esakinan. Kukwisa School tambe ta otro cu lo haya material. Pa e resto di siman tin un lista largo cu nan lo pasa na e scolnan pa entrega nan diferente material pa nan gymzaal, Minister Croes a indica.

            E ta kere cu esaki ta un bunita gesto y como gobierno, e parti cu ta toca nan, nan ta duna support tambe na e tipo di intercambionan di material asina. Sigur esaki lo sirbi diferente scol rond di Aruba pa e muchanan por tin material y pa e scolnan ta ekipa cu materialnan deportivo.

            E mandatario a expresa palabranan di danki na Sport for Youth na Aruba y Sports for Children na Hulanda. El a agrega cu pa final di November un otro container lo ta yegando y lo tey pa duna aporte un biaha mas.