Consulta Nacional cu sector musical na Aruba cu participacion amplio y informacion hopi valioso

Comision Patrimonio Cultural Intangibel:

ORANJESTAD (AAN): Comision Nacional Patrimonio Cultural Intangibel Aruba (PCI) ta anuncia cu hopi satisfaccion cu e prome Consulta Nacional cu sector musical, cu a tuma lugar riba diasabra, 11 di april 2026, na JFK Education Center, a resulta un exito significativo.

E evento a reuni un cantidad amplio di participante, incluyendo musico, compositor, productor, educador musical, hoben y miembro di comunidad, reflehando e  compromiso di e sector cu desaroyo y preservacion di e musica Arubiano.

Bao di e tema “Ban Combersa di Musica na Aruba”, e consulta a crea un espacio habri y constructivo pa dialogo, intercambio di idea y reflexion riba e estado actual y futuro di musica na Aruba. E participacion activo di diferente actor clave a contribui na un discusion rico y representativo di e diversidad cu ta caracterisa e panorama musical y e herencia bibo.

Durante e sesion, a logra haya informacion valioso tocante tradicionnan musical, practicanan vigente, manera di transmision y e necesidadnan di salvaguardia den e sector. E datonan recolecta durante e sesion di trabao aki ta di gran importancia y lo forma un base solido pa e siguiente paso den e proceso di creacion di Aruba su Inventario Oficial di Patrimonio Cultural Intangibel.

Ademas, e consulta a facilita e identificacion preliminar di elementonan di patrimonio musical, asina como di practicantenan, portadonan di tradicion y otro stakeholdernan relevante. E informacion aki lo yuda guia e proceso di documentacion y reconocimento di expresionnan musical cu ta biba den nos comunidad.

Esnan presente a expresa nan deseo y nan interes pa continua cu e tipo di dialogonan aki y esey ta masha aprecia mes.

PCI ta considera e resultado di e consulta como un paso clave den e trayecto pa desaroyo di un inventario nacional inclusivo y representativo, conforme cu e tratado di UNESCO di 2003 pa salvaguardia e patrimonio cultural intangibel di Aruba. E comision ta reafirma su compromiso pa sigui fomenta participacion di comunidad den futuro consultanan cu lo cubri otro area cultural.

Comision Nacional Patrimonio Cultural Intangibel Aruba ta gradici tur participante pa nan contribucion, apertura y compromiso. Hunto, ta bay sigui traha pa conserva, documenta y fortalece nos identidad cultural pa generacionnan futuro.