Segun Consul Gustavo Serrano Amaya:
ORANJESTAD (AAN) – Colombianonan residente na Aruba por haci uzo di e servicio di consulta legal gratis cu Consulado di Colombia ta ofrece. Segun Consul Gustavo Serrano Amaya, e iniciativa aki a sigui activo despues di e bon resultado cu a logra aña pasa.
Pa ricibi e servicio, interesadonan solamente mester manda un mensahe via WhatsApp na 561-1095 solicitando un cita. E consultanan ta wordo ofreci semanalmente tur diahuebs door di un asesor legal cu ta brinda orientacion den diferente rama di derecho.
Segun Serrano Amaya, e servicio ta destina pa Colombianonan cu tin duda, kier orientacion of ta enfrentando algun situacion di caracter huridico. “Si tin algun problema legal of tin un asunto cu mester aclaracion, por consulta cu e abogado den cualkier rama di derecho,” el a indica.
Ademas di e asesoria legal, e consul a informa cu e consulado ta trahando riba diferente iniciativa den beneficio di comunidad colombiano na Aruba. Entre nan un programa di atencion dental gratis pa 500 colombiano cu no tin cobertura di AZV.
El a agrega cu pronto lo cuminsa tambe un proyecto di salud unda Colombianonan cu no tin AZV of otro seguro medico lo por ricibi consulta medico y examen di laboratorio gratis.
Cu e iniciativanan aki, Consulado di Colombia ta sigui fortalece e bienestar di su conciudadanonan na Aruba, facilitando acceso na servicionan esencial manera salud y orientacion legal.
