Gustavo Serrano Amaya di Consulado Colombiano:
ORANJESTAD (AAN): E relacion entre Aruba y Colombia ta sigui fortalece cu diferente iniciativa cu ta beneficia ciudadanonan di ambos pais. Un di e desaroyonan mas reciente ta e inauguracion oficial di e ruta directo Bucaramanga–Aruba–Bucaramanga di Wingo, cu a cuminsa opera dia 17 di juni cu dos vuelo pa siman. E conexion nobo ta facilita turismo, comercio, inversion y acceso na servicio entre e dos destinonan.
Segun Gustavo Serrano Amaya di Consulado Colombiano, e ruta ta responde na un demanda creciente di Colombianonan y Arubianonan cu kier biaha directamente pa e region di Santander, sin mester pasa Bogota prome.
“E conexion ta haci e trayecto hopi mas rapido y eficiente, permitiendo cu mas hende por conoce diferente regionnan di Colombia y fortalece e intercambio entre ambos pueblo,” Serrano a declara.
E consul tambe a resalta cu Bucaramanga ta ampliamente reconoci pa su servicio medico specialisa di calidad halto, loke ta haci e ciudad un destino importante pa hopi residente di Aruba cu ta busca tratamento medico.
Ademas di fortalece conectividad, Consulado di Colombia ta sigui impulsa proyectonan social na Aruba. Recientemente a lansa su di dos campaña di salud oral, ofreciendo limpiesa dental completamente gratis pa Colombianonan cu ainda no ta afilia na AZV, aunke nan situacion migratorio ya ta regularisa. E servicio ta wordo brinda den colaboracion cu dos clinica dental na Aruba, y interesado por registra door di un formulario publica riba pagina oficial di Facebook di Consulado.
Pronto tambe lo anuncia e di dos programa medico na unda lo brinda oportunidad na Colombianonan residencia na Aruba y cu no tin AZV, pa haci chekeonan medico y examennan di laboratorio gratis.
E iniciativa ta forma parti di un esfuerso mas amplio pa fortalece bienestar di comunidad Colombiano residente na Aruba, mientras cu e ruta nobo ta habri mas oportunidad pa cooperacion economico, turistico y medico entre Aruba y Colombia.
E desaroyonan reciente ta confirma cu e relacion historico entre e dos pais ta sigui crece, basa riba conectividad, colaboracion y beneficio mutuo.
