Construccion pa comberti ex-Codemsa den un Centro di Husticia lo inicia na April 2024

Minister Rocco Tjon:

ORANJESTAD (AAN): Diahuebs mainta, Minister di Husticia y Asuntonan Social sr. Rocco Tjon, a reuni cu e arkitecto y e Account Manager Vastgoed di APFA pa loke ta e construccion di e centro di husticia na ex-Codemsa. Aña pasa e ley a wordo aproba unanimamente pa asina e edificio aki wordo comberti den un centro di husticia, caminda lo bay ubica diferente departamentonan hudicial hunto bou un solo dak. APFA a adkiri un "consultant" pa prepara ful e destaho pa cu e proyecto aki. E preparacionnan pa cu e destaho ta canando bon y lo finalisa februari, pa asina por scoge e compania cu lo bay ehecuta e proyecto aki na maart 2024.

            Manera ta conoci, aña pasa e ley a wordo aproba unanimamente den Parlamento di Aruba pa loke ta e construccion di un centro di husticia nobo na ex-codemsa, caminda lo bay ubica diferente departamentonan hudicial, entre otro; Bureau City Inspector, Inmigracion Aruba, CEA y KPA. Esaki, cu e meta pa introduci diferente funcionalidadnan nobo cu nos no conoce ainda den husticia, y na final di dia percura pa reduci gastonan di diferente huurnan cu tin andando na e momentonan aki

            Despues di un proceso amplio caminda a involucra e diferente departamentonan y sindicatonan, APFA ta den e proceso di preparacion pa loke ta trata e destaho publico. Pa nan por logra esaki, nan a adkiri un consultant pa loke ta e parti di construccion, kende ta preparando tur e documento y pinturanan pa e destaho por tuma luga. E intencion ta pa e destaho aki tuma luga otro aña den e luna di februari, pa asina nan por scoge e compania cu ta bay percura pa e construccion di esaki.

            Por ultimo, e mandatario a expresa cu e reunion tawata uno positivo, caminda por wak cu tur cos ta canando segun e plan. Manera a indica caba, e proyecto aki lo bay tin beneficionan multiple, cuminsando na e hecho cu ta bay paga menos na huur y ta bay tin condicionnan di trabou completamente nobo, mirando cu tur cos ta bay ta nobo den e edificio. Ta trata di un inversion di alrededor di 20 miyon florin, pa asina e trabounan pa cu e edificio nobo pa e centro di husticia, por inicia na april 2024.