ORANJESTAD (AAN): Diahuebs atardi durante un conferencia di prensa Minister di Cultura y Finanzas Xiomara Maduro a papia riba e conseho di CAft y a reaccion di parti di Gobierno.
E mandatario a cuminza bisa cu e kier a reacciona riba e conseho cu CAft a duna riba presupuesto di 2022 cu a keda aproba pa Parlamento di Aruba conforme e reglanan.
“CAft a duna su recomendacion riba 10 di Mei y e tabata tin 13 punto”.
Gobierno tambe a reacciona riba e consehonan aki y riba 27 di Mei Gobierno a manda su reaccion pa CAft, segun Maduro.
El a splica cu despues cu CAft a manda su reaccion, Gobierno a manda esaki pa Parlamento.
“Mester bisa cu Gobierno di Aruba a tene debido cuenta cu tur locual ta e consehonan di CAFT, no solamente den e carta aki pero tambe den e memoria di splicacion cu ta compaña presupuesto 2022”.
Eyden caba nos a tene cuenta cu locual ta e consehonan cu CAft a brinda y tambe Raad van Advies.
Mester tuma na cuenta cu Gobierno a tene cuenta cu e consehonan di CAft y a haci cambionan den e presupuesto di 2022 a base di e recomendacionnan di CAft y tambe nos a duna splicacion ora cu manda e asina yama ‘uitvoeringsrapportage’ di 2021, eyden tambe nos a bay den locual ta e consehonan cu CAft a duna, segun e mandatario.
El a splica cu bo ta wak cu ora cu a ricibi e ultimo carta, tabata un ripiticion di tur e consehonan cu a wordo duna desde 2019 te cu aworaki.
“Den e conseho aki CAft a pone 13 punto, cu ta puntonan cu ya caba Gobierno a yega di reacciona riba nan, ya caba a tene cuenta cu nan, ya caba a haci cierto cambio a base di nan y pesey aworaki ora cu bo mira e consehonan cu CAft ta duna, nan ta djis resumi tur conseho cu ya caba a yega di wordo duna, pues no ta cosnan nobo cu a bin acerca, segun e minister.
