ORANJESTAD (AAN): Na Aruba y varios caminda na mundo sigur na Hulanda, pa diferente molester medico y sigur dolor, Paracetamol ta wordo duna of prescribi pa docternan.
Mayoria hende tin e pildora aki na cas y hopi hende mesora ta dal uno si nan sinti dolor di algo.
Sinembargo pa un grupo di persona, uso di e remedi aki mester ta limita.
Ta trata di e grupo di hendenan muher cu ta embaraza.
Uso di demasiado pildora di Paracetamol durante embarazo por ta dañino pa e baby na caminda.
Esaki segun un grupo di cientifico Mericano y Danes.
Nan ta conseha hendenan muher na estado pa no uza e pildora sin mas.
Solamente si e ta realmente necesario.
Segun e cientificonan Paracetamol posiblemente ta menos ‘inocente’ di locual e ta mustra di ta.
Den e revista cientifico Nature Reviews Endocrinology, nan a publica tur e efectonan secundario di e remedi.
Un di e efectonan negativo di uso frecuente di e pildora durante embarazo ta cu e por causa daño na cerebro di e baby no naci ainda manera ADHD of atraso den lenguaje.
Otro problema cu Paracetamol por causa durante embarazo ta cu e aparato reproductivo di e baby por keda sin wordo desaroya completamente.
College ter Beoordeling van Geneesmiddelen (CBG) y centro di efectonan secundario Lareb na Hulanda ta enfatiza cu mester ta cauteloso cu uso di e medicina aki durante embarazo.
“Uza Paracetamol solamente si ta absolutamente necesario, mas cortico posibel y den e dosage mas abao posibel”, segun CBG.
Tin algun profesor si cu no esceptico.
Asina profesor di cuido farmaceutico di pashent di Universidad di Utrecht Marcel Bouvy a bisa revista Trouw cu e no ta mucho impresiona pa e estudio di e cientificonan Mericano y Danes.
“Frecuentemente a haci un estudio riba e efectonan secundario di Paracetamol y te ainda nunca tabata tin un conclusion concreto”, segun Bouvy.
