Aruba mester haya contesta riba potretnan di formulario di voto - Veredicto di Huez den caso reconteo voto ta exigi splicacion autoridad - Den Corte di Husticia a keda proba cu a kibra base eleccion secreto
ORANJESTAD(AAN)- Con e proximo eleccion na Aruba lo tuma lugar? Lo haci uzo di machine pa vota? Con Aruba lo vota y cual ta e medidanan cu a wordo tuma pa evita cu leynan cu ta regla eleccion secreto no ta wordo kibra?
Preguntanan cu segun expertonan mester haya contesta ya cu un pais semper mester ta prepara pa un eleccion cu cualkier desaroyo por produci na forma inespera.
Pues e hecho cu cualkier desaroyo politico por conduci na elecction nobo, mester ta semper un consideracion na un pais democratico.
Na segundo lugar tur cambio cu wordo haci na e proceso electoral por tuma tempo y loke a bini dilanti durante e ultimo eleccion na Aruba, sigur ta motibo pa duna mas sosten legal na e sistema di eleccion secreto.
Expertonan ta insisti cu Ministerio Publico a base di e veredicto di Huez den e caso cu AVP a entrega pa reconteo di votonan, mester studia e veredicto y tambe splica comunidad con ta bay evita pa violacion di ley cu ta mishi cu e sistema di voto secreto, tuma lugar.
A wordo mustra riba e hecho cu den e veredicto di Huez a bini dilanti con e violacion di eleccion secreto por produci casonan di corupcion si ciudadanonan saca potret di nan voto cu ta resulta den man di partido cu asina ya haya prueba si un hende of vota pa nan of no.
“E veredicto di Huez a contene un acusacion contra partido AVP. Huez a bisa cu e formularionan di voto cu AVP a presenta como prueba, tabata un violacion di ley cu ta regla voto secreto. Ta prohibi pa saca portret di voto pa asina evita entre otro, benta di voto,” a wordo treci dilanti.
Importante ta na e momentonan aki pa Conseho Supremo Electoral splica kico a pasa realmente y si tabata tin persona cu a haya permiso pa no tene nan mes na e leynan cu ta bisa cu no por saca potret di un voto cu mester keda secreto.
Si a duna permiso pa saca portret y manda esaki via telefon of na otro forma pa e oficina principal di Conseho Supremo Electoral, kende tabata tin permiso pa saca y manda e portret? Un partido politico cu como observador tabata presente, por a haya copia di e formulario di voto y por a haya informacion?
Despues di eleccio varios politico di oposicion a trece dilanti cu hende a bisa nan cu nan a vota pa nan. Cu tin votador cu ta expresa nan mes di e forma aki, sin cu nan a vota pa cierto politico, ta conoci y ta duna prueba cu den mundo politico na diferente forma ya por pone presion riba votadornan, cu te awor tin asistencia di ley pa nan haci como sifuera nan a vota pa un persona sin cu nan a haci esaki.
Saca potret ta elimina e posibilidad cu e votador por duna prueba cu el a haci loke el a bisa pues duna un partido politico prueba cu el a vota pa e partido.
No mester lubida cu Huez den e caso di registronan di voto tambe a mustra cu politiconan no por uza e registronan aki pa haya informacion cu ta permiti nan pone presion riba un ciudadano pa bay vota of hasta bay busca un hende na cas pa bay vota, manera AVP a bisa cu e ta haci a base di e registronan di voto cu e no a haya na forma completo a base di decision di Huez.
Informantenan di DIARIO ta insisti pa mas informacion wordo duna di loke a pasa cu e sentencianan importante di Huez, ya cu ta base di e sistema politico democratico di Aruba ta na discusion.
