Conseho di Raad van State riba HOFA ta desapunta

Segun profesornan Elzinga y Hansko:

ORANJESTAD (AAN): Prof. mr. Douwe Jan Elzinga y Prof. mr. Hansko Broeksteeg, diaranson ultimo a publica un analisis fuertemente critico di e conseho cu Raad van State di Reino a emiti tocante e Consensusrijkswet HOFA. 

Segun e profesornan, e conseho ta desapunta den profundidad y analisis, pasobra segun nan, e no ta trata suficientemente e consecuencianan constitucional, e riesgonan pa autonomia di Aruba. y e problemanan structural relaciona cu e uzo di un consensusrijkswet. Nan ta cuestiona specialmente con boluntario e acuerdo por ta, si Aruba no por sali unilateralmente y ta keda dependiente di decisionnan di Conseho di Minister di Reino na Den Haag. 

Un di nan preocupacion principal ta e autoridad cu HOFA ta duna Conseho di Minister di Reino pa aproba cambio den e Landsverordening di Aruba. Segun e expertonan, un construccion asina no ta cuadra cu e sistema constitucional vigente y ta limita e autoridad di Gobierno y Parlamento di Aruba. Nan ta cuestiona tambe si e ley por wordo aproba cu un mayoria simpel, of si un mayoria di dos tercera ta necesario. 

E profesornan ta reconoce cu HOFA por ofrece Aruba acceso na prestamo y refinanciamento cu condicionnan mas faborabel. Sinembargo, nan ta cuestiona si e beneficio financiero ta hustifica e reduccion di autonomia y e incertidumbre tocante e duracion di supervision. Aruba por solicita retiro di e ley despues di por lo menos tres aña cumpliendo cu tur norma, pero e decision final no ta den man di Aruba solamente. E analisis aki ta confirma e necesidad pa Aruba actua cu cautela.

Por conclui cu e analisis di Prof. Elzinga y Prof. Broeksteeg cu a wordo comparti riba LinkedIn, no mester wordo interpreta como un atake contra Raad van State, ni como un desacuerdo total cu e conseho di Raad van State. Nan critica ta enfoca principalmente riba e profundidad di e analisis y riba algun aspecto constitucional cu, segun nan, no a haya suficiente atencion.