Conseho di Minister a haya presentacion riba e modelo di poder di compra pa Aruba

Minister Geoffrey Wever:

ORANJESTAD (AAN): Diabierna, 12 di april riba peticion di Minister Geoffrey Wever Economisch Bureau Amsterdam a duna un presentacion elabora na Conseho di Minister riba e proceso pa traha un modelo di poder di compra (“koopkrachtmodel”) pa Aruba.

            Un “koopkrachtmodel” ta un instrumento necesario pa midi e posibel impacto di maneho riba e poder di compra di hogarnan na Aruba. Pais Aruba actualmente no ta dispone di un modelo asina. Minister Geoffrey Wever durante tratamento di begroting 2024 di Ministerio di Asuntonan Economico, Communicacion y Desaroyo Sostenibel den december 2023 a elabora riba e necesidad grandi pa un “koopkrachtmodel”.

            Conseho di Minister riba 12 di januari 2024 a duna aprobacion, riba peticion di Minister Geoffrey Wever pa inicia e proceso pa traha un “koopkrachtmodel” pa Aruba. Diabierna, despues di tres luna Economisch Bureau Amsterdam ta duna Conseho di Minister un presentacion riba con e "koopkrachtmodel" ta traha y con e por wordo uza comon un instrumento di maneho pa midi e posibel impacto di maneho riba e poder di compra di hogarnan na Aruba.

            Un meta importante di maneho economico ta pa mehora e poder di compra di tur ciudadano. Pa logra e mehoracion di poder di compra ta necesario pa tin un instrumento manera e “koopkrachtmodel” cu ta haci'e posibel pa na un manera efectivo implementa maneho cu un impacto positivo riba e poder di compra na Aruba.

            Ta net tres luna cu nos como pais a inicia e proceso pa traha un koopkrachtmodel y e trabao ta den su fase final. P'esey ta na su luga cu despues cu Parlamento di Aruba a wordo debidamente informa riba e koopkrachtmodel, Conseho di Minister tambe haya un presentacion riba e uzo di koopkrachtmodel y riba e proceso pa yega na esaki, segun minister Geoffrey Wever.