El a bishita Aruba mas di 30 biaha
ORANJESTAD (AAN): Exactamente dos siman pasa, e informe tristo a drenta cu e conocido turista Ellen Skinner Livernois di 77 aña biba na ciudad di Nashua na estado di New Hampshire, a fayece na Southern New Hampshire Medical Center.
Ellen a studia y obtene su diploma como Nurse na aña 1969, y el a dedica su bida pa cuida otronan. El a traha como nurse registra na Brigham Hospital y tambe Women’s Hospital pa mas di 45 aña, yudando hopi hende prome cu el a baha cu pensioen na 2015. E ta casa cu Lawrence ‘Larry’ Livernois pa 44 aña.
Den su tempo liber, Ellen tabatin gran pasion pa viahamento, y a yega di explora numeroso pais manera Egipto, Maroco, Spaña, Francia, Grecia, Belgica, y hopi isla tambe den Caribe.
Sinembargo e tabata bisa tur hende cu su faborito ta Aruba, unda el a keda ripiti su bishita mas di 30 biaha. Na Aruba e tabata goza di restaurantnan cu bon cuminda, y tambe varios bishita na Casinonan.
Ellen tabata encanta di ta un wela y bisawela, y tabata aprecia cada momento cu e ta pasa cu su famia. Su entiero lo tuma lugar na ciudad di Nashua, na New Hampshire.
