Conciertonan pronto lo start atrobe - ORANJESTAD (AAN): E ta Albert Vrolijk, kende ta mas conoci na Aruba como DJ-101, y e ta conoci tambe como promotor, y cu a sa di trece artistanan local y internacional riba escenario na Aruba.
Como cu na Aruba tambe y otro paisnan ya a flexibiliza medidanan pa mitiga e brote di Coronavirus, y danki na e hecho cu hopi hende a vacuna y asina e nivel di contagio a baha, por nota cu promotornan ta hibando aworaki combersacion grandi pa prepara eventonan.
Esaki ta wordo empuha pa e hecho cu varios artista grandi diripiente ta liber y sin ningun Tour planea ainda, pues nan ta ‘habri’ pa cualkier actividad na cualkier pais cu ta cla pa organiza concierto.
Segun DJ-101, a base di esey tin combersacionnan andando aworaki pa asina ofrece entretenimento local. Esaki ta wordo haci hunto cu organizadornan na Curacao tambe. DIARIO a compronde cu tin hopi idea nobo pa asina haci e actividadnan aki mas trendy. Pero por lo pronto nan ta djis den etapa di combersacion.
Aruba tin potencial den artistanan local y internacional cu por duna prestacion na nivel top. Tin di keda pendiente pa mas desaroyo y informacion nobo, despues cu tur e combersacionnan keda concretiza.
Tin plannan grandi y Aruba por spera conciertonan grandi y artistanan internacional pa bin duna show na Aruba. Un contract ya caba a wordo firma, y sigur islanan ABC lo keda contento cu e artista aki lo bin, y e lo cambia e panorama diferente pa cu conciertonan.
DJ-101 a bisa cu nan kier inclui por lo menos 3 of 4 artista local cu lo duna opening show, pa asina subraya e sosten cu nan tin pa talentonan di e islanan aki tambe.
