WILLEMSTAD: Diabierna marduga pa 12:20 am, hendenan a yama Polis na Curaçao pa bisa cu patras di Misa di Soto riba Kaminda Serapio Pinedo tin un hende morto benta abao.
E prome unidad di Polis cu a yega eynan, a topa cu un homber abao benta cu diferente impacto di bala na su curpa. E no tabatin ningun señal vital mas.
Docter a wordo yama, y na su yegada a constata morto di Shurvey Chanél Delando, naci dia 2 September 1990 na Curaçao, pues tin 32 aña di edad.
Shurvey Delando ta un futbolista activo na e isla, y a hasta representa Curaçao den seleccion nacional. Su pasion ta pa futbol, y a yega di hunga pa hopi team den 1er Division y tambe pa Division di Honor.
Fiscal a ordena pa confisca e curpa pa practica autopsia, y awor Polis na e isla ta pidi publico pa yuda cu tip pa asina soluciona e caso.
