Conocido chef John Croes a fayece Diahuebs marduga

A bira conoci pa ‘John Pizza’...

ORANJESTAD (AAN): Tabata Diahuebs marduga, cu e noticia tristo a drenta cu e chef mas famoso di Paradera, esta John A. Croes a fayece.

   Su comienso: John di hopi hoben caba a demostra un amor grandi pa prepara suculento platonan den cushina, y tabata prepara cuminda na forma consistente y cu dedicacion.  Un di su empleonan na comienso tabata como Kokki den Prison.  E tabata traha semper cu tur mesa, cashi, y superficie limpi pa asina tur esnan encarcela haya cuminda cayente cu ta saludable.

   Sinembargo ora cu decision a ser tuma pa elimina e Cushina di Prison, e ora John Croes tambe a bandona empleo eynan.  Pafo el a cumpra un Snacktruck y a cuminsa bende cuminda cu publico, y mesora a crea un cadena di clientenan fiel.

   Su forma social pa comunica cu clientenan tabata algo admirabel, y semper ta cla pa combersacion riba tur topico.  Cu placer tambe e tabata divulga varios secreto di prepara cuminda, y ta dunabo su opinion di e.o. cual tipo di carni e ta prefera, etc.

   Contract pa prison: Ora el a prepara espacio cu ekipo pa un cushina grandi, el a participa na destaho publico y a logra di haya e contract pa suministra Prison y Wardanan di Polis cu cuminda.  Su amor pa traha cuminda na gran escala tabata visible e tempo ey, ora e ta spierta di mainta trempan caba pa cuminza prepara pa e entrega di e dia ey na Prison.  Y presonan tabata encanta e bon calidad di cuminda cu nan tabata ricibi.  John sa cu cada preso of detenido ta un ser humano, cu debi na circunstancia di bida of situacion a haya nan mes encarcela.  Pesey e ta pensa cu nan merece come algo bon.

   Un conocido abogado na Aruba tambe, kende den pasado pa cierto caso a wordo encarcela, despues di su liberacion bek a expresa con asombra el a keda pa e cuminda sirbi na Warda di Polis procedente di John’s Catering.  El a bisa cu el a haya un Basket di Half Chicken pa come.

   Expertimenta cu Pizza: Durante e temporada ey tambe, el a habri un negoshi na Piedra Plat pa sigui bende cuminda cu publico, y a cuminza ofrece Pizza tambe.  E tabata bisa tur hende, cu su Pizza ta basa riba receta cu el a obtene for di Italia.  Y esaki a bira popular tambe.

   E tabata famoso pa su Steak Baskets, su Pizza, su Burrito di Cabaron, Pan cu Lomito, y Chicken Wings cu bo ta haya sirbi den baki grandi di foil.  Tur esaki cu su famoso saus di conoflok cu ta un hit desde decada di 1990 tempo e tabatin un Snacktruck banda di e brug di Piedra Plat pa bay Santa Cruz, y despues a sigui pa establecimento na Piedra Plat, a sigui cu un Snackbar na Paradera net pabao di Great Rich Restaurant, y despues a bay pa ex-Charlie’s Rumshop na Sero Patrishi, y ultimo a regresa pa su cas net pazuid di Misa di Paradera.

   Ora cu pa motibo di politica, nan a kibra su contract cu Prison, John a dedica su mes e ora mas riba su cuminda bendi cu publico.  Pero pa dirigentenan di Prison di KIA, e decision ey tabata fuerte, como cu e Presonan a cuminza protesta fuertemente debi cu nan no kier a acepta ningun otro cuminda merdia, si acaso e no ta bin di John Croes su catering.

   Malesa a bati porta: Ultimo añanan, debi na malesa na varios ocasion John a haye ta busca asistencia medico, y a pasa den operacion pa atende esaki.  Malesa a pone cu el a perde hopi peso tambe, pero asina mes el a keda cu animo y ora cu e por, e tabata habri su Takeout na Paradera pa sigui sirbi comunidad.

   El a bira popular durante Pandemia, unda el a cuminza ofrece cuminda manteniendo prijs cu ta yega na cartera di tur hende.  Y esey ta algo cu John semper a percura cu su negoshinan.  E no tabata cobra exorbitantemente pa su productonan.  E ta bisabo tambe, cu claro si bo bay cumpra cabaron, bo sa mesora cu esey ta mas caro universalmente.

   Ademas di cuminda, e tabata horna Bolo, Pandushi, y Pan frances tambe y bende cu comunidad ultimo añanan.  Pero ora cu su curpa ta sinti malo, e ta laga e negoshi cera y no ta atende publico.  Su clientenan a indica cu ultimo biaha cu e tabata habri ta Diamars e siman aki ofreciendo Pan frances.

   John Albert Croes a nace na Aruba dia 19 Augustus 1955.  E tabata un persona hopi liga tambe cu iglesia, tabatin bon contacto semper cu su empleadonan. Chef John tabatin 68 aña di edad.  Na su famia, amigo-, y clientenan, DIARIO ta extende su mas profundo palabra di condolencia.