Conferencia organiza pa Facultad di Hospitalidad y Maneho di Turismo di Universidad di Aruba tabata un exito

Parlamentario Evelyn Wever-Croes;

ORANJESTAD (AAN): Recientemente Parlamentario Evelyn Wever-Croes a asisti na un conferencia organiza pa e Facultad di Hospitalidad y Maneho di Turismo di Universidad di Aruba. E tema durante e conferencia aki tabata basa riba e pasado, presente y futuro di turismo.

   Parlamentario Wever-Croes a expresa cu e facultad ta celebrando nan di 20 aniversario, y cu p’e ta un honor pa por mira con nan a desaroya durante e 20 añanan aki, mirando cu su persona tabata parti di e colegio supervisor di universidad 20 aña pasa na momento cu e facultad a lanta. Durante tur e añanan aki, hopi ta esnan cu a logra titulonan grandi na Universidad di Aruba, y awe ta fungi como profesionalnan den e area di turismo.

   “Mi ta sumamente orguyoso di cada un di nan, y ohala cu e discusionnan hiba durante e conferencia, tambe por defini e futuro. Importante ta  decisionnan cu a worde tuma den pasado pa Gabinete Wever-Croes, Aruba One Happy Island. Pero pa Aruba ta un isla dushi pa bishita, e mester ta un isla dushi pa biba, y mi ta contento cu den e discurso di tur e oradornan, esaki tabata e liña cora.

   Enfasis mester worde poni riba nos hendenan , pa asina por crea di pais Aruba un dushi luga pa biba. Unabes nos logra esaki, nos por invita nos bishitantenan pa bin den nos hogar y goza tambe di e pida baranca aki y tur loke nos tin di ofrece.

  Pabien na Universidad di Aruba cu nan di 20 aniversario. Tambe un pabien na e Senior Year di e facultad di Hospitality and Tourism Management Studies (FHTMS) pa organiza e encuentro aki. Mi ta sumamente orguyoso di e studiantenan aki” Parlamentario Wever-Croes a expresa.