ORANJESTAD (AAN) – Durante e rueda di prensa yama pa “G297 na vanguardia di Enseñanza”, tambe e lider di SIMAR Josephine Albertus,
a hiba palabra, refiriendo na e Conferencia “Enseñanza, nos responsabilidad”, cu e grupo aki ta organizando pa Diamars 10 di Mei, cuminzando pa 3 or di atardi.
Josephine Albertus a menciona cu e Conferencia aki lo tuma lugar na Instituto Pedagogico Arubano, den tres diferente sala. Pero mirando cu e cupo ta un poco limita, nan a habri e posibilidad tambe pa personanan por sigui e conferencia aki, online. Riba facebook page tanto di IPA como di SIMAR, e temanan ta publica caba cu nan respectivo orado. No tin costo pa e Conferencia aki.
El a menciona cu tin invitacionnan cu a sali caba pa esnan cu G297 ta desea di forma parti di e grupo y nan lo informa cual ta e link pa esnan cu kier registra.
Nan ta pidi tur hende pa registra trempan pa wak con ta bayendo cu e cuponan, y di biaha scoge e tema di nan preferencia. Tin tanda 1 y tanda 2 pa nan por organiza e conferencia mucho miho.
Cada tanda lo tin un aspecto di un presentacion, cu ta dura 20 minuut, pero tin un parti di votacion y elaboracion. Despues di cada presentacion lo sigui cu e ponencianan unda tur hende lo por duna nan opinion, y lo haci uso di e opinionnan ey di biaha, durante e momento di elaboracion y, na final, tur hende cu ta na IPA lo bin hunto den un sala grandi pa presenta e parti di panel, unda nan lo por asocia e puntonan cu a sali importante den cada sesion, na otro. Na final tambe, lo tin un forma di evaluacion unda por indica si e informacion ricibi, e dia aki, por trece cambio di pensamento.
Por ta un hende a vota pro algo basa den locual e ta kere, pero na final despues di tur informacion ricibi, por ta el a cambia di pensamento. Esaki ta e maneranan con e organizadornan di e Conferencia ta bay purba di involucra tur hende, pa e no ta so un forma di presentacion pero tambe nan kier cuminza cu e combersacion. “Pasobra nos a bisa cu Enseñanza ta un responsabilidad conhunto, e ta nos responsabilidad anto mi ta kere cu tur hende envolvi den e campo di enseñanza pa hendenan pafo, den gremio, na cas, mayornan, muchanan, tur hende mester asumi nan parti, pero basa riba informacion di e situacionnan real”, Albertus a señala.
