Conferencia di Decada di Oceano 2024 a termina cu “Declaracion di Barcelona”

• Tambe cu Coastal Clean na Aruba door di Scolnan di UNESCO na Aruba

ORANJESTAD (AAN): E conferencia di Decada di Oceano 2024, teni na Barcelona for di 10 te 12 di April, cu participacion di mas di 1,500 participante for di 124 pais y mas di 3,000 persona online, a termina cu e presentacion di e Declaracion di Barcelona. Un ruta clave pa avansa iniciativanan oceanico.

E declaracion ta identifica prioridadnan principal pa amplia ciencia y conocemento di oceano, enfatisando e co-diseño y co-entrega di ciencia pa trata desafionan importante manera contaminacion maritimo y economianan sostenibel oceanico. Fuera di esaki, a discuti rekisitonan esencial pa infrastructura di ciencia di oceano, cu atencion riba uzo di tecnologia avansa pa un uzo husto di datonan.

E conferencia a cubri diverso tema dirigi na promocion di un oceano limpi, saludabel y resiliente; economia oceanico cu ta sostenibel y resiliente; oceano sigur y predicibel; un oceano interesante y atrayente pa tur hende.

Den corto e decada di oceano ta un esfuerzo global pa promove investigacion y maneho sostenible di lama. E decada ta core entre 2021 pa 2030 y IOC/UNESCO ta coordina esaki pa Nacionan Uni, ademas esaki  a bira e iniciativa di ciencia di oceano mas grandi tuma den historia.

E decada ta consisti di 10 desafio, por ehemplo: Compronde y elemina contaminacion maritimo; Proteha y restaura ecosistemanan y biodiversidad; Desaroya un economia di oceano sostenibel y equitativo; Desblokea solucionnan di lama pa cambio climatico; Aumenta resiliencia di comunidad na peligernan di lama.

Ta premira cu lo soluciona e 10 desafionan pa 2030. Pa medio di diferente programa y proyectonan unda nos lo yega na e 7 resultadonan di e Decada di Oceano, cu ta describi e oceano/lama cu nos kier.

Relaciona na e 10 desafionan y Dia di Tera 2024, cu tema ‘Planeta Contra Plastico’, dr. Marck Oduber di UNESCO Aruba a duna diferente presentacion na scolnan di UNESCO, relaciona na e desafio number 1 di e Decada Oceanico, cu ta ‘Compronde y elemina contaminacion maritimo’.

E serie di presentacionan a presidi e limpiesa di nos areanan na canto di lama cu a haci limpi diasabra 20 di April, door di: Scol Basico Pr.Amalia, Scol Basico Hilario Angela y EDUCAMPUS. Tur tres scol ta forma parti di e red di scolnan di UNESCO.

Sr. Oduber a representa UNESCO Aruba y IOCARIBE na Barcelona Spaña durante e reunion relaciona na e Decada di Oceano cu a tuma lugar entre 10-12 di April, 2024. IOCARIBE ta e oficina regional di IOC/UNESCO.

UNESCO Aruba ta orguyoso tambe cu Surfside Science di Metabolic Aruba, cu ta un initiativa pa desaroya y duna validez na methodonan pa monitoria dato ambiental na costa, awor ta cataloga como un proyecto di e Decada di Oceano. Den Caribe tabata tin un falta di proyectonan relaciona na e Decada di Oceano, specialmente den Islanan den Desaroyo.

Pa informacion di e Decada di Oceano por acudi na pagina web www.oceandecade.org.