Concepto nobo di Arcade Aruba by Wind Creek a habri su portanan

ORANJESTAD (AAN): Despues di algun luna di preparacion y diseña un concepto nobo pa Renaissance Marketplace,

a bin na e idea pa crea un arcade. Arcade Aruba by Wind Creek a habri su portanan oficialmente pa tur mucha y  ‘gamers’ nan di Aruba.

   Un idea unico pa entretene e muchanan mientras cu e mayornan ta disfruta y relaha na un di e establecimentonan di Renaissance Marketplace. Awor por hunga, spaar y cambia punto pa premionan atractivo.

   Pa algun luna caba por a presencia movicion di renobacion tumando lugar. Tur hende curioso pa sa kico lo bay bini nobo na Renaissance Marketplace. Mientras cu di pafo e tabata un misterio, parti paden tabata transformando den un arcade moderno. Asina cu a revela e misterio, tur hende a bira ansioso pa e gran apertura di Arcade Aruba by Wind Creek.

   Un arcade cu ta cubri espacio di 180 m² cu e ultimo tendencia di tecnologia pa cu gameroom. Tur hungado por cumpra un ‘game-pass’ pa $1 y recarga esaki cu e suma cu nan ta desea. Na cada machine bo tin cu scan e ‘game-pass’ pa asina acumula bo points. Una bes cu bo saldo caba, bo por recarga esaki facilmente na e cashier y sigui hunga. Mas bo hunga, mas punto bo ta acumula, mas grandi bo premio lo ta. Premionan ta varia di mangel, pa peluche, pa un bala di basket te na un wega di Monopoly of e tan gusta camera ‘Go-Pro’. Arcade Aruba ta conta cu 22 machine cu 16 wega interactivo manera e famoso mesa di ‘air hockey’, wega di basketball of purba bo suerte na e ‘claw-machine’ cu premio al instante y mucho mas.

   Bao musica, blaas y confetti, Elliott Loonstra, Aruba su atleta Paralympic, a corta e cinta simbolisando e Gran Apertura. Wind Creek ta conoci pa duna back na comunidad, aki ta caminda cu a invita e muchanan di Sonrisa pa hunga y sera conoci cu e lugar, na final tur mucha a bay cas cu un bunita regalo.     

   Di acuerdo cu Sr. Paul Gielen, Gerente General di Renaissance Aruba; “E arcade a worde crea pa agrega mas entretenimento na Renaissance Marketplace. Asina e muchanan por hunga y pasa pret mientras cu e mayornan ta disfrutando na un bar of restaurant. Esaki ta simplemente e comienso, den futuro nos lo agrega mas machine”.

   Arcade Aruba ta habri tur dia for di 12:00 pm te cu 12:00 am ofreciendo tambe asina un delicioso kids menu.