Laura Luces Bastoncelos, Coordinador:
ORANJESTAD (AAN) – Señora Laura Luces- Bastoncelos , Coordinador Pais di 'Con Venezuela', tambe a hiba palabra durante e conferencia di prensa cu a tuma lugar Diaranzon 24 di Juli, y pa cuminza el a gradici prensa local pa su presencia, den un momento asina crucial pa e bida y historia di Venezuela.
'Con Venezuela' a nace di e union di tur e partidonan politico, cu ta haci bida politico democratico na Venezuela. “Pasobra nos tin cu recorda cu e partidonan politico tipo COPEI, Accion Democratica, Primero Justicia, Voluntad Popular, nan tarheta, nan sede di partido, e constitucion di nan partido, a wordo horta di e original y entrega na otro personanan. Bisando esaki, mi kier invita tur Venezolano pa Diadomingo 28 di Juli, for di 6’or di mainta te cu 6’or di atardi, aproxima na e Consulado di Venezuela na Aruba, cu ta ubica na Tanki Flip #6.
Esaki ta hopi importante pa e actividad mahestuoso cu nos ta bay realiza cu ta e eleccion presidencial di Venezuela y nos ta invita nan pa vota pa nos candidato, señor Edmundo Gonzalez Urrutia”, Laura Luces Bastoncelos a expresa.
El a reitera cu unico rekisito cu nan mester ta e cedula di identidad lamina, y e por ta vigente of expira. “Si su nomber ta aparece dentro di e buki electoral bo tin tur derecho di vota, y ningun hende por prohibi’e.
“Tambe nos kier expresa, maske por sona mahos pa bis’e, cu nos no tin ningun duda riba nos triunfo. E encuestadornan serio principal di e pais, aproximadamente un mes atras, ta duna un bentaha solido y contundente na nos candidato. Esaki ta e informacion di Mega Analisis. Esey ta e intencion na e voto. Tin un claridad contundente tocante ken ta bay gana e eleccionnan na Venezuela”, Laura Luces a conclui.
