AZV mester exigi investigacion acuerdo pa construccion Hospital
*E raiz di un Gerencia Mericano desconoci cu trahador Arubano
*Pakico contracto no ta haci posibel pa SOGA demanda contratista?
ORANJESTAD (AAN) — Mientras ta parce cu ultimo problemanan cu a surgi na Hospital, lo drenta e reino di silencio, AZV ta keda cu e deber pa exigi un investigacion di e acuerdo cu tin entre SOGA y e compania constructor mayor di e proyecto hospital nobo.
E situacion cu a surgi na Hospital di Aruba no ta algo cu por pasa pa historia sin mas, awor cu a wordo dicidi cu trahadornan Arubano mes por termina e trabou.
Aruba ta un Estado di Ley y ta Ley ta dicidi kico por pasa na Aruba of no.
Pa por tabata tin un relacion entre SOGA, cu ta e compania financiador di Pueblo di Aruba den e proyecto di Hospital, y e contratista mayor den renobacion y ampliacion di Hospital Horacio Oduber, mester tin un contracto basa riba Ley.
Un contracto firma na nomber di Pueblo di Aruba y sigur ora tin placa envolvi, no ta permiti pa laga ningun buraco habri cu por conduci na un desacuerdo entre SOGA y e contratista mayor di e proyecto Arubano.
Manera SOGA mes a trece dilanti, no ta prome bez cu SOGA y e contratista mayor no ta di acuerdo cu otro, loke ta algo sumamente straño debi na e hecho cu pa Ley cu ta regla con ta gasta placa di Pueblo no por tin desacuerdo cuanto placa y con placa ta wordo gasta ni kico e trabounan ta contene.
Ley na Aruba ta defende e interes di e Arubiano ora placa di Aruba ta wordo gasta y ta exigi pa tur gasto cu wordo haci na nomber di Aruba of e Pueblo di Aruba, no ta contene riesgo pa e Pueblo ni pa e pais.
Ora tuma nota di e proyecto hospital for di e momento cu el a keda presenta dor di Gobierno Mike Eman, ta mira un interes grandi, cu ta e popularidad politico di partido AVP di Gobierno Mike Eman, cu a hinca Aruba den algo sumamente serio.
No por ta cu un proyecto ta surpasa gastonan original na e forma cu a socede den caso di Hospital, cu ta uno di e proyectonan cu a wordo critica dor di Algemene Rekenkamer Aruba, cu ta encarga cu e “inspeccion” di ehecucion di Leynan cu ta regla e forma legal pa gasta placa di Pueblo di Aruba.
Den e forma pa ehecuta e proyecto aki como parti di e “Bo Aruba” mayoria di Parlamento entre 2009 pa 2014 cu tabata sostene Gobierno Mike Eman, a permiti e gobierno gasta placa contra reglanan democratico cu ta encera cu por a gasta 1.6 Biyon pafor di control y autorisacion di antemano dor di Parlamento di Aruba.
DIARIO a bay en busca di asuntonan serio manera e pregunta pakico no por demanda e contratista, cu mester por ta den su razon pa e por bay laga e proyecto sin termina, manera a wordo acorda oficialmente y legalmente den e contracto.
Ora bolbe den historia di e proyecto ta topa cu e realidad cu e realisadornan di e proyecto, no tabata comprende e sistema di ehecuta proyecto segun costumber di trahadornan Arubano.
For di principio di e contracto ta topa cu e situacion inaceptabel cu Mericanonan tabata presente den nan team di Gerencia cu no tabata comprende e “modus operandi” di e Arubiano, pero cu cual nan a dicidi di traha.
Esaki ta e problema cu a causa e desastre di loke e hospital lo a bira?
Na 2014 Alex Schwengle a bisa cu durante cinco aña Aruba lo gasta 252 Miyon pa e hospital mas moderno y eficiente den e region.
Na e inicio di e proyecto, Aruba Investment Bank pa medio di su dirigente a presenta un proyecto di maravia na Aruba, mescos cu a pasa cu tur e otro oradornan.
Ora mira atras kico a pasa cu Hospital for di 2014 pa 2023, strea ta cay for di cielo y awor e contratista a bay y laga 10 porciento di e trabou ainda pa termina.
Un situacion inaceptabel pa democracia a presenta. Un Hospital cu a conoce candela y situacion di inundacion, pa no papia mes di e holor di gas, ta e instituto cu mester percura pa bida di e Arubiano.
Politica pa AVP haya voto a conduci na e ley dictatorial Comunista cu ta obliga e Arubiano pa ta den AZV cu awe mester cuminsa cu un investigacion di loke ta pasa den Hospital di Aruba.
DIARIO ta sigui traha, sigui investiga e situacion inaceptabel na Hospital, cu autoridad mester investiga pasobra placa, bienestar y bida di e Arubiano a wordo pone na peliger!
