Dahariana Evertsz, Hefe Promocion di Salud-DVG:
ORANJESTAD (AAN) – Den entrevista cu DIARIO, Dahariana Evertsz, Hefe di Promocion di Salud na Departamento di Salud Publico (DVG), a duna di conoce cu e Comite, cu ta consisti di DVG, IBiSA y POH, nan a bin cu un plan pa concientiza comunidad tocante e dia di Obesidad.
Tin algun informacion cu hopi hende por a mira den television y via plataformanan social tambe, y e problematica cu esaki tin pa comunidad.
Papiando di cifranan Evertsz a señala cu na Aruba 75% di e poblacion di 20 aña y mas, tin sobrepeso y obesidad. 43% tin sobre peso 32% tin obesidad.
Un di cada 3 persona, di e poblacion adulto aki ta hendenan cu ta sufri di obesidad, den principio. E dama a subraya cu hopi biaha mester wak e percepcion di e personanan aki. E por ta un aspecto di su parti fisico y e parti social tambe, anto cu kico e profesionalnan por asisti pa yuda nan y tambe concientiza nan si nan mes sa cu nan tin sobrepeso of obesidad.
Dahariana Evertsz a indica tambe, pa esnan cu ta bisa cu ta flaco, cu a base di un investigacion cu a wordo haci na aña 2017, 60% di nan tin peso normal y 73% di esnan cu ta pensa cu tin peso normal tin sobrepeso.
Esaki ta mustra cu hopi hende no ta conciente, y esaki por pasa cu cada persona, sea hende muher of hende homber, y edad ta varia tambe. Esaki tin hopi factor di riesgo. Aworaki e plan ta pa henter e comunidad. Pa loke ta muchanan di scol tin e programa “Scol Saludable” cu ta enfoca hopi riba prevencion pa mucha di scol basico te cu esnan di 25 aña di edad.
Dahariana Evertsz a menciona cu nan ta enfoca riba hendenan cu ta traha tambe. Aña pasa hopi hende por a wak cu nan a enfoca hopi riba promocion di salud na pia di trabao y esaki ta nan mision tambe e aña aki, pa no solamente enfoca riba nutricion pero educa nan tambe con nan por tuma responsabilidad pa nan mesun persona y nan famia, pa preveni sedentarismo den nos hendenan na Aruba. Esaki ta un reto no solamente pa DVG, IBiSA y otro organizacionnan, pero pa henter comunidad pero nan ta educa e personanan tambe pa hunto cu nan logra e mision di tin un bida mas saludable y cu calidad di bida.
