Mike Eman tin algun splicacion pa duna pueblo prome cu nos dera gay - *Un fiesta cu placa y tereno di Pueblo no por wordo dera sin husticia - *Mike y Benny back to back a trapa riba ley pa condena futuro di Aruba
ORANJESTAD(AAN)—Dia 24 di Juni Aruba ta bay dera gay. Tin un gay cu no por wordo dera y esaki ta e prueba oficial cu a wordo compila pa e Tribuna di Cuenta di Aruba, e Algemene Rekenkamer di Aruba, cu a splica den su rapport “Bo Aruba” con Mike y Benny a spart placa di Pueblo, cu conocemento di resto di Ministronan.
Manera e texto di e rapport di Algemene Rekenkamer Aruba ta splica bon cla, contra tur regla di bon gobernacion y hasta di Ley di Contabilidad, Mike y Benny a dicidi kico ta sigui hinca den e totalidad di proyectonan den cual a cumpra tereno cu placa di Pueblo di cantidad di hende pa cantidad di proyecto.
E cantidad di placa cu a wordo reparti pa produci e proyectonan aki, no a paga solamente pa e Arubianonan cu Mike a yama contratistanan chikito, mientras e placa grandi mes tabata lora.
Cu Mike y Benny a traha “back to back” pa abusa di placa di Aruba, laga un debe cu ningun hende por calcula exactamente, Mike mes a trece dilanti ora el a yora e hecho cu Benny a wordo detene den e caso Avestruz.
Pero kico Mike y Benny a dicidi riba placa di Pueblo, si no a bini dilanti mientras Pueblo mester paga tur e desastrenan cu Mike a laga atras.
Awe Mike ta den su penthouse mientras cantidad di famia di Aruba ta yora den e miseria di crisis cu Mike Eman a laga atras di loke el a haci cu placa di Pueblo y cu den e proyectonan di “Bo Aruba” ta mustra dede riba e crueldad politico mas grandi cu Aruba a conoce y cu Mike y Benny a ehecuta hunto segun e autoridad financiero di Aruba, Algemene Rekenkamer Aruba.
Ora lesa e rapport e pregunta ta, si Mike tin concenshi.
Con un politico por drumi anochi si e ta na haltura con el a abusa di placa y tereno di Aruba pa crea su proyectonan, cu a haci cu rond Aruba terenonan a wordo cumpra pa realisa proyectonan manera tram, Watty Vos Boulevard, cantidad di rotonde, di viaduct rond Aruba.
Cu Mike kier bolbe den Parlamento awe, por comprende. Mike a kere cu Pueblo di Aruba lo a bay roga pa e bolbe y sigui destrui Aruba manera el a haci.
Teniendo cuenta cu loke nos leynan ta bisa, e rapport Bo Aruba mester a bay Husticia. Ministerio Publico mester duna un ehempel di loke por haci y deshaci cu placa di Aruba segun e Ley di Contabilidad.
No ta solamente Algemene Rekenkamer Aruba, pero hasta Hulanda a splica cu ta incontrolabel loke Mike Eman a haci cu e proyectonan aki, cu Hulanda mes ta condena.
Hulanda a mustra asina cu e proyectonan aki no a wordo realisa segun ley pa gasta placa di Pueblo, cu ta exigi pa uzo di placa di pueblo bay na proyectonan cu resultado defini pa Pueblo.
Hulanda ni ningun hende por establece realmente kico Mike a haci cu e fondo di 1.6 Biyon di cual e cu Benny tabata dispone manera nan tabata kier pasobra e Parlamento cu a sostene Gabinete Mike Eman a laga Mike y Benny haci loke nan tabata kier, manera e rappor ta bisa.
Awe Aruba ta prepara pa dera gay. Pa prepara tereno pa un epoca un nobo.
Mientras candela ta bay halto pa kima sushi cu a acumula, Aruba ta sigui en busca di un futuro nobo, cu no tin luga pa figuranan manera Mike Eman y Benny Sevinger, cu a destrui bienestar di Aruba manera e rapport Bo Aruba ta duna prueba!
