Analisis di e desaroyonan riba tereno di energia ta papia idioma cla - Paisnan productor di petroleo tabata sa cu nan hora lo a yega - Auto electrico ta solamente un prueba cu mester planifica pa papia
ORANJESTAD(AAN)- Siman pasa, ora ya e momento culminante tabata acerca pa mundo, DIARIO a lansa un solo pregunta.
Si den futuro electricidad ta bira e combustibel mas importante, cu kico ta bay produci electricidad?
DIARIO a haci e pregunta aki pasobra na e momentonan aki na Aruba tin un proyecto pa distribui gas, cu por wordo uza na WEB y tambe tin pendiente e proyecto di un refineria di Quanten.
Awe e forma cu DIARIO a informa y prepara Aruba ta demostra di tin base. Loke mester a pasa cu lo pasa, a socede ora e paisnan productor di petroleo a bisa mundo: “take it or leave it”.
E pregunta pa analisa awor ta, kico haci si mundo dicidi cu e ta deshaci di petroleo y di gas como fuente di energia.
Es mas. Den otro articulo nos lo papia di un producto di petroleo, cu a reemplasa cantidad di producto cu antes tabata wordo traha di entre otro glas, cu ta plastic.
Nos tabata sumamente pendiente pa e reunion di OPEC, cu tin un posicion central na momento cu mundo ta trata di recupera di un pandemia cu a destrui economia mundial.
Pa hende sobrevivi, e mester come y pa e come e mester tin trabou.
Pa un motibo hende a inventa candela, cu a permiti hende cushina, a permiti hende proteha su mes contra frieu.
Awe hende mester rehabilita e clima cu el a destrui pero e mester cuminsa haci uzo di loke clima y naturalesa ta ofrece sin causa desastre na planeta tera.
DIARIO a papia di e energia cu ta wordo crea dor di solo, pero cu paisnan manera Aruba y paisnan cu desierto grandi cu solo na abundancia, no ta utilisa manera mester ta.
Ta ora tur pais adopta na loke naturalesa ta ofrece, por pone fin completo na uzo di petroleo y gas.
Rond mundo por mira mulina di biento. Na paisnan grandi cu ainda tin parti di pueblo cu no a bandona nan custumber, por mira con nan ta uza forsa di awa pa wielnan produci coriente.
E reunion di OPEC a duna contesta na un mundo di fantasia di papia y papia pero sin solucion concreto den man.
E demanda mundial pa petroleo na mundo na 2021 ta subi na 2022. DE ta sigui subi mientras companianan petroleo lo sigui hinca placa den economia.
Pero mundo mester soluciona su problema di clima di cual petroleo ta un parti.
Ora papia di produccion di auto di coriente por ehempel, mester tene na consideracion cu e materia cu e sistema di e auto ta uza pa por traha riba coriente y cu tambe ta material sumamente peligroso pa hende.
Na e momentonan aki, por nota cu ta produci gas y petroleo cu menos substancia peligroso pa hende.
Esaki mester ta prioridad mientras ta sigui traha riba regreso na naturalesa pa loke ta trata energia pa mundo por funciona na forma responsabel.
