Eleccionnan 2021 a exigi accion pa sigura democracia real
*Huez a preveni loke por a bira mashin di corupcion y dictadura
*Resultado di voto secreto tabata den man di lider di oposicion
ORANJESTAD(AAN)—Aruba ta goza di un Carnaval, cu lo wordo sigui pa un temporada di intensificacion politico na caminda pa 2025 cu lo bira aña electoral.
Ya na final di 2023, DIARIO pa medio di informacionnan concreto riba desaroyonan politico na Aruba, a trece dilanti cu por spera un intensificacion serio di actividad politico na 2023.
Mientras por nota mas y mas candidato pa puestonan den Parlamento di Aruba y asina den gobernacion di Aruba tambe, informantenan ta indica cu no tabata tin accion den mundo politico y sigur den Parlamento pa sigura cu e peligernan cu Huez a trece dilanti den Sala di Corte di Husticia na 2021, lo no afecta democracia real na Aruba.
Na Aruba tin un grupo creciente cu ta sumamente preocupa, cu politica a sigui su curso di semper y no a duna e atencion na e veredictonan di Huez relaciona cu casonan directamente mara na e sobrevivencia di democracia realmente.
Den sala di Corte di Aruba, Huez a rechaza e intentonan di lidernan politico di AVP, pa e proceso electoral por duna fruta na sistemanan politico den cual e votador, lo por a resulta den man di e partido cu lo a haya oportunidad pa pone presion riba e votador pa vota pa e partido.
Manera ta conoci e eleccion di 2021, tabata wordo confronta cu e posibilidad cu e sistema manual pa vota lo a wordo cambia pa un proceso electronico cu ta elimina e posibilidadnan actual cu a bini dilanti den Sala di Corte y a mustra con e voto sagrado di e Pueblo por a wordo uza como vehiculo pa manipulacion.
E lider di oposicion Mike Eman y su partido a exigi registronan cu informacionnan importante di votadornan pa asina por a bay busca votadornan cu a dicidi cu nan no ta vota na nan cas, pa hiba nan bay vota.
Huez a bay contra suministro di informacion cu no ta necesario na partidonan politico.
Despues di eleccion a bini eleccion pa reconteo di voto cu tambe a bay resulta dilanti Huez, cu a rechaza e posicion di AVP cu formularionan di eleccion no mester wordo kima ya cu tabata tin mester di un recontea.
Como argumento pa esaki, e decision secreto di e votadornan hancra riba nan formulario pa vota, a bira prueba pa e representantenan di AVP, cu a reclama cu tabata tin voto cu no a worde bon yena.
Huez a mustra cu e hecho cu e resultado di eleccion, cu mester ta secreto, a bay cay den man di partido AVP cu a presenta esaki den Corte di Husticia, ta contra Leynan di Aruba y tambe e proceso electoral cu mester evita corupcion cu ta destrui e proceso democratico.
Informantenan di DIARIO ta sumamente preocupa cu den e mundo politico, atencion no ta wordo duna na e advertencianan serio cu a bini dilanti den Corte di Husticia y a wordo pronuncia pa Huez, cu a rechaza actonan di partido AVP, cu ta contra Ley.
Manera a wordo mustra na DIARIO, na caminda pa eleccion 2025, e desaroyonan aki mester regresa den sala di Parlamento cu tin e deber di trata e contenido di e casonan cu a wordo presenta na Huez, cu a rechasa loke mester wordo cualifica como arma pa corupcion haciendo uzo di e proceso electoral.
“Huez a adverti den su palabranan y sentencianan pa loke mester wordo cualifica como e cuna di corupcion pero tambe dictadura, den cual e politico ta haya prueba di un votador cu e votador a vota pa su partido, loke ta habri porta directamente pa dictadura.
E sistema electronico lo deshaci di e peliger cu formularionan di voto secreto a wordo publica na Aruba, cu awor mester atende seriamente cu loke a pasa durante eleccion 2021 na Aruba pa asina evita ripiticion di e intento.
