Comunidad ta invita pa bishita exposicion di buki tocante Papiamento

Fundacion Lanta Papiamento

ORANJESTAD (AAN): Na ocasion di celebracion di Dia Internacional di Lenga Materno, Fundacion Lanta Papiamento (FLP), den colaboracion cu Biblioteca Nacional Aruba, ta invita comunidad pa bishita e Exposicion di Buki ‘Papiamento’, un evento dedica na promove y duna balor na nos lenga materno.

E exposicion lo presenta un coleccion amplio di publicacion na Papiamento of tocante Papiamento, incluyendo buki cientifico, gramatica y ortografia, material di enseñansa, literatura y otro publicacion relevante.

E exposicion ta habri di diaranson 18 di februari te diabierna 27 di februari 2026.

Orario ta dialuna y diaranson: 8:00 am – 7:00 pm. Diamars, diahuebs y diabierna: 8:00 am – 5:00 pm. Luga: Departamento Arubiana-Caribiana, Biblioteca Nacional Aruba ubica na Bachstraat 5

E exposicion ta ofrece un oportunidad pa conoce mas di desaroyo, investigacion y creatividad literario na Papiamento. FLP ta invita scol, maestro, studiante, investigado y tur hende interesa den lenga y cultura pa forma parti di e iniciativa aki.

Pa mas informacion por tuma contacto cu Fundacion Lanta Papiamento of bishita Biblioteca Nacional Aruba.

Promove nos lenga. Duna balor na nos identidad.