Comunidad Filipino ta un ehempel di integracion positivo mientras ta manteniendo nan identidad cultural

Fraccion di AVP

ORANJESTAD (AAN): Miembronan di Fraccion di AVP a asisti diabierna na e ceremonia oficial pa conmemora e 128 aniversario di Independencia di Filipinas, organiza door di Embahada di Filipinas y e comunidad Filipino na Aruba na Wilhelmina Park na Oranjestad.

E ceremonia a reuni miembro di comunidad, representante diplomatico, autoridad local y otro invitadonan special pa celebra un fecha di gran significado historico y nacional pa e pueblo Filipino. Durante e acto, a destaca e balornan di libertad, determinacion, unidad y progreso cu ta caracteriza e historia di Filipinas.

Fraccion di AVP a expresa su pabien na e comunidad Filipino cu e ocasion special aki y a reconoce e contribucion importante cu miembronan di comunidad a y ta sigui haci na Aruba.

“E comunidad Filipino ta un parti integral di nos sociedad. Den diferente sector manera salud, educacion, turismo, comercio y servicio publico, nan dedicacion, profesionalismo y compromiso a contribui significativamente na desaroyo di nos pais,” segun Fraccion di AVP.

AVP a enfatisa cu Aruba ta orguyoso di su caracter multicultural y di e relacionnan di amistad cu diferente comunidad internacional cu ta haci Aruba nan cas. Segun e fraccion, e comunidad Filipino ta un ehempel di integracion positivo, manteniendo su identidad cultural mientras cu nan ta contribui activamente na progreso di Aruba.

Durante e ceremonia, a reflexiona riba e historia di independencia di Filipinas y riba e importancia di preserva balornan democratico, respet mutuo y cooperacion entre pueblonan.

Fraccion di AVP a señala cu Aruba y Filipinas comparti hopi balornan comun, incluyendo e importancia di famia, educacion, trabou duro y servicio na comunidad. E lasonan di amistad entre ambos pueblo nan a fortalece durante añanan gracias na e presencia y participacion activo di e comunidad Filipino den Aruba.

“Na ocasion di e 128 aniversario di Independencia di Filipinas, nos ta extende nos pabien y miho deseo na tur Filipino na Aruba y rond mundo. Nos ta gradici nan pa nan contribucion continuo na nos comunidad y ta desea e pueblo Filipino hopi prosperidad, paz y exito den futuro,” AVP a expresa.

Fraccion di AVP a reafirma su compromiso cu una Aruba inclusivo, unda tur comunidad ta sinti respeta, aprecia y reconoci pa e aporte valioso cu nan ta haci na nos sociedad.