Miosotis Tromp, Tienda di Educacion:
ORANJESTAD (AAN) Señora Miosotis Tromp, di Stichting Tienda di Educacion, a indica den entrevista cu DIARIO, cu loke mas ta capta nan atencion ta e aspecto di comunicacion.
Esaki mirando cu e generacionnan ta cambia hopi. “Nos ta ripara cu e liña di crianza cu nos tabata haya e tempo aya, no ta aplicable mas pa e generacionnan aki. Anto, pa nos ta hopi importante pa enfoca riba e conexion cu e mucha p’asina bo comunica.
Hopi biaha nos ta pensa cu comunicacion ta duna instruccion y ya. Pero hopi biaha e ta involucra tambe, kico e mucha ta sinti, con accesible e ta, anto nos tin cu crea e conexion pa nos por comunica cu e mucha”, Miosotis a splica.
El a agrega cu e forma di crianza tambe ta crea un efecto unda hopi biaha e mayor ta aplica loke e mes a haya pero cu no ta aplicable cu e mucha.
Esaki ta top dos aspecto cu Tienda di Educacion ta mira, sigui mas tanto cu e comunicacion entre e mayornan.
“E co-parenting, hopi biaha nan ta lubida cu nan rol como mayor ta keda, pero e rol di pareha no mas. Anto, con pa yega na un comunicacion sano riba esey?
Tambe nos ta haya hopi, mirando cu enberdad cosnan por pasa ora mayornan separa, pero e parti di e rol di mayor ta keda importante, y nos ta purba yega na e mayornan pa hunto nan por duna un ‘Co-parenting’ saludabel. cu ta yuda e desaroyo di e muchanan tambe”, Miosotis Tromp a relata.
El a subraya cu e parti di comunicacion entre mayornan ta primordial, mirando cu e cifra di separacion di mayornan ta hopi halto den comunidad y no tin e comunicacion entre nan, pa por sigui guia.
“Tin mayornan cu ta na punto A y punto B, y dos extremo hopi diferente; nos ta wak tambe cu tin mayornan cu tin mas cu un yiu y nan no sa con pa maneha e situacion. Tambe tin mayornan cu tin yiu ta nace cu un neuro-deficiencia, manera autismo, of ADHD, nan no sa kico pa haci, con pa approach e mucha, con pa duna e cuido, kico si ta traha, kico no, y esey ta caminda nan ta bati porta cerca nos. Nos por guia riba cierto aspectonan, mirando cu nos tin e area basico, y ora ta mas intensivo nos ta referi nan na Sociale Zaken, na unda nan por duna un miho guia”, señora Miosotis Tromp a duna di conoce.
