Companianan y otro expertonan riba tereno digital a brinda hopi apoyo y ayudo na ‘Setar Digital Week’

Director Ing. Roland Croes hopi agradecido:

ORANJESTAD (AAN) Director di SETAR NV, ing. Roland Croes, a sigui relata den entrevista cu DIARIO, cu e compania a ricibi hopi apoyo y ayudo, pa por realiza e “SETAR Digital Week”, di otro companianan of personanan cu ta experto den e tereno digital. Tur a contribui hasta gratuitamente, locual ta wordo aprecia hopi.

  Ing. Croes a bisa cu hopi hende cu a bay, a hay’e como un oportunidad pa laga pueblo di Aruba siña y esey tambe SETAR ta aprecia masha hopi mes.

“Pa nos e ta un manera pa henter pueblo haya e oportunidad di siña. Lastima cu no por a haci e lugar mas grandi pero mi ta kere cu e lugar ta traha tambe, pa e tipo di actividadnan aki. E intencion tambe ta pa nan yama Conexion Center pa haya mas contacto cu pueblo, pa nan por bin pa nos splica nan kico ta pasando. Anto nos kier haci mas tipo di e sesionnan aki. Tin mas compania ta hacie caba pero e ta mas den ambiente di tecnologia, etc.” Ing. Roland Croes a señala.

Croes a señala cu logicamente mester haci afspraak, pero pa loke ta sigur ta pa negoshi. Negoshinan chikito te grandi, y esun meymey cu ta jong, nan trabao ta bira e productonan di SETAR pa e comerciante chikito, e comerciante Arubiano. Esey ta e intencion di e lugar aki, el a recalca.

“Nos productonan mester bin ‘all vast’ ora a caba di lanta. Nos ta bin cu paketenan tambe, nos ta ocupa cu revision total. Nos prijs, structura di prijs y productonan, combinacion di security y AI, etc., nos ta ocupa cu un sistema completamente registra tur cos, pero intencion ta cu esaki ta e lugar unda nos por topa, papia di tecnologia y yuda bo”, director Roland Croes a reitera.

E siman aki ta dedica e ora ey na yuda pueblo pa no keda atras den desaroyo. “Nos ta pensa cu esaki ta e futuro di Aruba, mester hende di un nivel tecnico mas halto pa nos cobra tambe pa e producto, y hasta por ta, di akinan tambe, exporta cierto cosnan pa turismo, manera tecnologia y otro ideanan creativo”, director di SETAR ing. Roland Croes a remarca.