Compania y contratistanan cu ta sushando centro di ciudad ta exponiendo nan mes na boetnan pisa

Bureau City Inspector cu suplica pa yuda mantene Aruba limpi

ORANJESTAD (AAN):  Vocero di Bureau City Inspector, Robby Rosel a duna di conoce cu tin un compania cu a tira hopi desperdicio di un negoshi (un joyeria den renobacion). Nan a pone cashinan, palonan, cahanan, diferente articulo, net na entrada unda antes tabata Ritz. Eynan barconan ta drenta y por mira tur e desperdicio aki.

            Rosel a agrega cu su persona a acerca e propietario di e negoshi aki. El a papia cu ne y a yega na un conclusion cu lo bay busca baki pa deshaci di e desperdicionan y esey mester a wordo haci diamars atardi.

            E vocero di BCI a haci un suplica na e contratistanan, na e comerciantenan den centro di Oranjestad pa mantene e ciudad limpi. "Ta bosonan mester di turista. Bosonan mester di entrada. Bosonan mester di e pan di cada dia. Pa ki motibo nos tin cu bay tira sushi, desperdicionan, saconan di sushi cu ta wordo tira patras di ex DOW, patras di La Venezolana, saconan cu ta wordo haya banda di Hotel Central", a expresa.

            Tin hopi adicto ambulante cu ta kibra e saconan y asina ta haya tur e desperdicionan aki ta bula, a remarca. Net eynan tin momentonan manera esun di Monumentenfonds pero tur dia tin sushedad di caya y sushedad cu kisas e comerciantenan ta paga pa wordo tira afo, a bisa.

            No haci esaki. Pa esaki tin companianan pa deshaci di desperdicio na Aruba manera Ecotech, Serlimar, etc.  P'esey BCI kier haci un suplica na cada comerciante den centro di Oranjestad pa deposita tur desperdicio den un bak'i sushi, mantene na candal pa evita cu e adictonan ambulante pasa y habri nan, saca loke tin aden, a expresa.

            Segun Rosel, den casonan asina e doño di e lugar "tin cu haya un hala di horea y tambe si mester bin un boet e doño di e lugar tin cu hay'e pa motibo cu ta e ta esun cu a pidi e contratista pa bay tir'e afo".

            Pero si e inspectornan di BCI yega na e sitio na momento cu e sushedadnan aki ta wordo tira ta e contratista chikito ta haya e boet aki. Y si e compania cu e pidi e contratista chikito pa tira e desperdicionan aki afo, cu nan demostra prueba di pago, e contratista chikito y e persona cu a manda nan bay tira e sushi afo, tur dos lo ricibi un boet, e PR di BCI a enfatisa.