Compania di exterior a dicidi haci donacion na JUMP18 Foundation Aruba

ORANJESTAD (AAN): Recientemente e compania Bredenoord, cu ta e partner di WEB Aruba NV den proyecto ‘Temporary 20MW Power Supply’, a haci un donacion na JUMP18 Foundation di Aruba.

   Di parti di JUMP18, dr. Jamiu Busari a ricibi e donacion di €2.500 cu hopi gratitud di Zef Jansen, manager comercial di Bredenoord. Esaki a tuma luga den presencia di empleadonan di WEB su departamentonan envolvi.

   WEB y Bredenoord ta den e di dos aña consecutivo trahando hunto riba e proyecto temporal di coriente. Como cu Bredenoord ta considera e partnership hopi valioso, nan a haya importante pa duna algo bek na comunidad di Aruba y e escogencia a cay riba Fundacion JUMP18.

   E fundacion aki ta brinda un variedad di actividad, educacion, coaching, y research pa tratamento y prevencion di obesidad infantil na Aruba. Di e forma ey kier yega na un estilo di bida saludabel pa muchanan y reduci e consecuencianan asocia cu obesidad infantil.