President di Parlamento Marlon Sneek:
ORANJESTAD (AAN): Presidente di Parlamento Marlon Sneek a expresa cu e ta lamenta cu Fraccion di MEP cada biaha ta purba di hinca Gobernador di Aruba den discusionnan. El a remarca cu como abogado, Lider di Fraccion di MEP mester sa cu nos constitucion ta bisa bon cla cu Parlamento ta un organo independiente cu ta haci su trabao. El a agrega cu niun hende, ni un prome minister, ni un gobernador por duna Parlamento direccion.
Presidente di Parlamento Sneek a enfatisa cu ta haci nan maximo esfuerso pa pone tur reunion cu ta wordo pidi den agenda. Tin diferente situacionnan cu por presenta cu no tin reunionnan riba agenda, sea un ta bin prome cu e otro. Segun e presidente di Parlamento, e ta depende tambe di e disponibilidad cu tin na Parlamento, entre otro di trahado, si e minister por ta presente, of si e ta den exterior. “Tin diferente situacionnan cu mi tin di tene cuenta cu nan na momento di yama reunion”, el a remarca.
El a agrega cu tin reunionnan riba agenda un tras di otro, y otro reunionnan ainda ta pendiente pa agrega riba agenda di Parlamento.
E presidente di Parlamento ta lamenta cu e mesun fraccion aki den pasado no tabata yama reunionnan. El a refiri cu durante e aña Parlamentario 2021-2022, 17 reunion publico a ser pidi y 10 so a wordo yama. Esaki segun e, no kiermeen cu e presidente di Parlamento di e tempo ey no tabata sirbi. Pero tawatin circumstancianan pa cua e 7 reunionnan aki no a wordo yama.
“Nos ta trahando constantemente pa optimalisa esaki y e listanan cu nos tin awor pendiente, porta tin un of dos reunion. Mirando pasado, mi ta kere cu nos a logra di tin un bon resultado den e aña cu ami ta presidente di Parlamento pa garantisa cu e gran mayoria di reunionnan cu a ser pidi, ta wordo yama manera nos reglamento di ordo ta pidi”, Presidente di Parlamento Sneek a enfatisa.
