Parlamentario Rocco Tjon tocante Salud Mental:
- Pero pa ehecuta full e routemap mester di fondo y mas personal
ORANJESTAD (AAN) Parlamentario Rocco Tjon, di fraccion di AVP, den su entrevista cu Matutino DIARIO, y refiriendo na e tema di salud mental, a expresa cu tin un desaroyo cu ta preocup’e hopi, y cu tin di haber, den su concepto, cu falta di prioridad.
“E structura cu nos a laga atras keto bay ta wordo uza door di e minister actual, y mi ta bisa esaki, pasobra riba algun pregunta cu nos a haci aña pasa, e minister a contesta por escrito cu e routemap cu nos a laga atras, cu ta core te cu 2030, e ta sigui ehecut’e. Anto e routmap aki a wordo traha door di tur e stakeholders den full e veld, den colaboracion cu PAHO (Pan American Health Organization), tambe. Kiermen e ta algo cu ta wordo carga door di full e veld”, Rocco Tjon a reitera.
El a agrega cu pa por ehecuta e routemap aki mester di fondo.
“Bo mester tuma suficiente personal den dienst, pasobra na final di dia e tin di haber cu personal tambe. Por ehempel, algo innovativo cu nos a introduci tabata e POH’s, pero specializa riba e tereno di salud mental. Nos a percura pa opleiding pa full e personal; hunto cu e profesionalnan di Stichting Hunto nos a percura pa nan wordo reorganiza por completo. Y mi ta kere Stichting Hunto ta un organizacion hopi renombra aworaki. Un ehempel pa full e sector”, Parlamentario Tjon a bisa.
