Minister Ursell Arends:
ORANJESTAD (AAN) –Den entrevista cu DIARIO, Minister Ursell Arends, a referi na e Congreso cu el a organiza pa adulto mayor, y kico a sali afo di dje, y kico lo por mira como efecto, den e siguiente añanan.
E mandatario a bisa cu a wordo organiza dos foro, y a institui un Comision, stuurgroep cu yama FAM (Foro Adulto Mayor). Pues, tin tres grupo di trabao pa canaliza e proceso di unda nan ta kere cu cierto areanan mester wordo atendi y con mester atende cu nan.
“Tin aworaki un persona cu ta skirbiendo e rapport pa e tres gruponan di trabao pero tambe pa e stuurgroep, y si tur cos ta bon, pa fin di October esaki lo wordo entrega na Gobierno di Aruba”, e mandatario a indica.
E dignatario a bisa cu tin hopi ley di adulto mayor cu mester wordo ahusta, y un di nan ta con nan ta paga belasting. “Esaki ta algo cu Parlamento di Aruba ya caba a haci algun ahuste, pero mi ta kere tin mas ahuste cu mester atende cu ne, y akinan tin un mocion cu recientemente a wordo pasa den Parlamento. Ami mes, como minister di adulto mayor a haci un peticion na mi colega Minister di Salubridad Publico, pa elimina e costo cu adulto mayor mester paga pa nan propio remedi, pasobra esaki tambe ta pone un barera con nan tin cu atende cu nan propio salud” Minister Arends a subraya.
E mandatario ta kere cu siguiendo e cifranan internacional, unda Aruba no ta keda mucho leu, e ta calcula cu 10% di e pensionadonan ta wordo afecta directamente, y ora ta trata di cuido entre tres pa cinco pashent, di tur e pensionadonan, tambe ta bay rekeri cuido. “E ora ey nos tin cu garantiza cu ora esaki drenta na vigor, nos tin e lugarnan, e servicio adecua pa brinda nan tambe”, Minister Arends a remarca.
El a finaliza, bisando cu e ta kere cu tin pobreza den tur sector di Aruba su comunidad, y pesey el a cuminza pa bisa cu como gobierno, no por gaba cu tin surplus, siendo cu bo ta wak deficit den tur skina di bo pais.
