Como 104 kilo di cocaina haya dera bao tera na costa Caribense di Colombia

RIOHACHA: Otro golpi duro ta loke autoridad a duna na narcotraficantenan den departamento di La Guajira na Colombia, ora cu a logra di descubri un lote di riba 100 kilo di cocaina, cu tabata dera bao tera cerca di lama Caribe.

   Polis a bisa cu e descubrimento a wordo haci pa unidadnan cu tabata haci control na Bahia Portete, cu ta situa na costa Colombiano, como 205 km pabao di Aruba.

   A nota cu algun caminda e tera no tabata igual cu e resto di tereno, y asina a descubri 4 caha.  A saca tur 4 caha, y den nan en total a haya 26 paki yena cu cocaina.  A pisa nan, y esaki a yega na 104 kilo.

   Esaki ta atrobe mesun tipo di modus operandi cu e narcotraficantenan ta usando na La Guajira, esta cu ta sconde droga bao tera hopi cerca di Lama Caribe, wardando pa e momento yega pa saca nan, pone nan abordo di speedboat tipo Go-Fast, pa asina nan mobiliza mesora sea pa Venezuela, of Islanan ABC, of tambe directo pa Republica Dominicana.

   Cu e droga a wordo haya na Bahia Portete, nifica cu e narcotraficantenan toch a logra di pasa tur e controlnan cu tin riba caminda tur rond di Riohacha y tambe Maicao, pa bin yega eynan y wordo dera.  A ser splica cu nan ta wardando kizas mas caha cu droga yega, pa asina na momento cu cierto monton di kilo yega, e ora numa hisa nan riba Go-Fast y laga nan subi lama.

    Autoridad Colombiano a confirma cu ultimo lunanan nan a logra intercepta tambe varios operacion di Go-Fast saliendo di Colombia.  Toch tin algun cu ta slip pasa bay.

   Polis Colombiano a indica den un boletin pa prensa, cu e droga intercepta aki ta un resultado nobo di autoridad cu ta siguiendo e financiamento criminal di un structura dedica na narcotrafico na La Guajira, cu tin coneccion cu e grupo arma organiza di Clan del Golfo.

   E biaha aki cu a haya droga bao tera, nan no a logra detene ningun persona.  Hopi biaha nan tin hende arma ta cuida e droganan aki scondi bao tera, pero ora cu nan mira Polis yega, nan ta spanta y core bay laga tur droga atras.