Common Good Conference a cuminsa cu un gran asistencia y energia positivo

ORANJESTAD (AAN): E Common Good Conference a cuminsa oficialmente cu un audiencia hopi entusiasma,

y hendenan ansioso pa ta parti activo di e movemento pa e bon comun. For di comienso, e atmosfera a mustra un sentido comparti di proposito, conexion y compromiso cu balornan cu ta pone hende y comunidad central.

E conferencia a habri cu un bendicion significativo di Pastor Grandt, cu a marca un tono inspirado y di reflexion. Despues di esey, Minister di Turismo, mr. Wendrick Cicilia, a duna palabranan di apertura, subrayando e importancia di cooperacion, responsabilidad comparti y vision a largo plazo pa construi un sociedad basa riba e bon comun.

E programa a sigui cu e prome ponencia oficial di Dr. Jelle van Baardewijk, kende su aporte a invita e publico pa pensa critico, participa activamente y asumi responsabilidad pa nan rol den forma un futuro mas husto y mas humano.

E mainta a sigui cu un presentacion di Esther Emerencia-Gomes, directora di Post Aruba, cu a haci referencia na su welo cu a bin den boto chikito for di Guajira Colombia sin nada, a establece su mes na Aruba y a keda nenga un hipoteca pa traha su cas. E comunidad di e tempo ey, a compronde e situacion cual hopi tambe a biba, a bin hunto y como un comunidad, a yuda su welo construi nan cas. Esey tabata e espirito di e Aruba di antes, den cual e sentido di yuda otronan, tabata fundamental.

Despues di e presentacion aki, Dr. Ad Verbrugge a duna su presentacion folisofico haciendo referencia na Aristotle, cu ta indica  cu e bon comun ta e proposito principal di un ciudad of sociedad. E bon comun ta trata di e bienestar comparti di tur hende, unda hende ta actua hunto como un solo comunidad, guia pa husticia, respet mutuo y amistad, y no solamente pa interesnan individual.

Na final di e session di mainta, a sigui cu un interaccion interesante entre e publico y panelistanan den cual a inspira esnan presente pa forma parti di e movemento di e bon comun.