Comision Nacional di Derecho di Mucha a presenta e resultadonan di un sondeo tocante derecho di mucha

ORANJESTAD (AAN): Recientemente Comision Nacional di Derecho di Mucha a presenta e resultadonan di un sondeo tocante derecho di mucha den

e sistema penal na e Minister di Asunto Social drs. Mervin Wyatt-Ras, Minister di Enseñansa mr. Gerlien Croes y Minister Husticia mr. Drs Arthur Dowers.

   E sondeo aki a tuma luga door di un recomendacion di Organizacion di Nacionnan Uni na Genève. Pa medio di consultanan na diferente organizacion, e comision a haya mas claridad riba e maneho penal na  Aruba. Durante e presentacion a duna recomendacionnan pa mehora, di manera structural, e posicion di mucha y hoben den e sistema penal y pa garantisa nan derechonan, locual ta hustamente un di e tareanan di e comision.

   E Comision Nacional di Derecho di Mucha ta un comision interdepartamental cu miembronan nombra via Decreto Ministerial. E miembronan presente tabata: Señora Sacha Geerman, presidente di e comision (DAS), Señora Gwennan Lisapaly Boekhoudt (DEA), Señora Mandy Lacle (DAO), Señora Swinda Dumfries (DVG), Señora Yarel Kelly (CBS) y Señora Magaly Maduro (Bureau Sostenemi). E comision ta conta ademas cu representante di ATHA, DBB, Voogdijraad, Señora Charlene Bontekoe y CEDE Aruba.

   Durante un reunion na Bestuurskantoor, e comision a entrega e recomendacionnan na e mandatarionan den presencia di Señora Rosanna van Dijk (directora di DAS) y Señora Seraida Pemberton di Fundacion Reclassering y Proteccion di Hubentud Aruba.

   E recomendacionnan ta basa riba bishita cu e comision a haci na 2023 na 12 organizacion cu ta hunga un rol importante den e cadena di husticia hubenil y riba un investigacion haci door di Departamento di Salubridad. Nan participacion a contribui directamente na formulacion di e recomendacionnan cu ta refleha e realidad y necesidadnan riba e tereno den cual e organizacionnan ta traha.

   A dividi e recomendacionnan den siguiente areanan di enfoke: husticia, enseñansa, salubridad y social.

Recomendacionnan principal for di e presentacion ta: (*) Desaroya un vision pa maneho pa e departamento hubenil di KIA. (*) Establece un institucion hubenil, cu posibilidad pa pone hende hoben bao di medidanan special (Pij), (*) Garantisa continuidad di enseñansa apropia den detencion hubenil, incluyendo un evaluacion di e necesidad di enseñansa. (*) Evalua posibilidadnan pa diversifica e oferta di enseñansa pa hoben, cu atencion special pa gruponan di riesgo. (*) Crea un sistema di monitoreo y evaluacion: enfoke riba promocion di salud y bienestar di tur hoben (den y pafo di detencion hubenil).

   Tambe tin: (*) Pa AZV reconoce addicion como un malesa (basa riba evidencia científico). (*) Desaroya trayecto pa hoben di riesgo dirigi pa enseñansa y trabao. (*) Evaluacion di efectividad di guia social pa famia di riesgo.

   E ministernan a expresa nan aprecio pa e trabao di e comision y a indica cu nan ta bay studia e recomendacionnan y lo bolbe invita e comision pa sigui cu e discusion, unda e recomendacion lo sirbi como guia pa maneho den futuro.