Comision di Enseñansa di Parlamento a tene dos reunion importante pa studiante na Hulanda

ORANJESTAD (AAN) Comision di Enseñansa di Parlamento di Aruba a organiza recientemente dos reunion di gran importancia.

E prome tabata cu miembronan di e Studentencommissie di Arubianonan na Hulanda (SCA) y otro cu e mentornan di Arubahuis.

   E comision di enseñansa tabata presidi pa e awo ex parlamentario Sonaly Fernandez-Acosta y ta consisti di miembro di tur fraccion. Fraccion di AVP a tuma nota cu varios biaha fraccion di oposicion ta publica cu ta reuni cu un entidad, dunando e impresion robes cu ta nan fraccion so a organiza y atende dicho reunion. Pa mantene e balor di transparencia, ta bon pa pueblo ta consciente cu ta representante di tur fraccion tabata presente como parti di un comision.

   E obhetivo di e reunion aki ta pa fortalece e laso cu nos studiantenan y tambe pa scucha di nan, pa asina por tuma nota y tene cuenta cu e retonan cu nan ta enfrenta. Di e manera aki, Parlamento di Aruba por enfoca y traha riba area caminda por traha di forma preventivo. Entre e puntonan importante cu a discuti, tabatin e preparacion pa loke ta dominio di idioma, maneho financiero y otro responsabilidad.

   E comision a intercambia ideanan constructivo pa asina por sigui traha riba un plan di accion pa facilita e transicion di nos studiantenan na Hulanda. Tambe a papia di idea di con pa motiva y atrae nos graduadonan pa regresa nan isla y pone nan conocemento y talento na disposicion di nos pais.

  Pa fraccion di AVP tabata un satisfaccion grandi di mira SCA representa pa un comision cu ta consisti di shete studiante cu ta tuma nan rol hopi na serio. Nan ta traha cu profesionalismo y pasion pa yuda otro studiante y sirbi como un modelo di inspiracion.

Den e mesun cuadro aki, comision di enseñansa di Parlamento di Aruba a invita e mentornan di Arubahuis tambe. Durante e encuentro aki a busca pa fortifica e apoyo y e colaboracion entre tur actor clave cu ta envolvi den e bienestar di nos studiantenan.

   Pa fraccion di AVP, dialogo y cooperacion ta clave pa yega na e solucion di tur e retonan cu nos pais ta enfrenta. Sea ta den comision di enseñansa, of den cualkier otro di e comisionnan existente, e parlamentarionan di AVP ta trahando responsablemente pa mantene un contacto estrecho cu e diferente sectornan di nos comunidad y yega na plan y pasonan concreto.