ORANJESTAD (AAN) – Comision di Bishita Real a invita prensa local pa un reunion “Technical meeting” relaciona cu e bishita di Famia Real na Aruba, durante awe Dialuna 30 y Diamars 31 di Januari.
Nicole Hoevertsz a splica prensa kico ta eigenlijk e proposito di e encuentro aki. El a bisa cu e Comision a traha duro pa yega na un programa di actividad balansa y cu e parti protocolar den dje
, gobernacion, ademas cultura y naturaleza, deporte y economia pa comparti cu e Famia Real. El a bisa cu tin un cantidad grandi di peticion di organizacionnan, comision, individual, personanan cu kier a cushina pa e Reina, cu kier a ofrece algo, haci nan un regalo, pero logicamente no por a complace tur.
Pero e Comision ta hopi gradici cu e entusiasmo grandi cu e comunidad ta demostra pa ricibi e Famia Real. El a expresa cu esaki ta e Arubiano cu ta duna bon bini na e bishitante di afo y sigur nos rey, nos reina y un persona cu ta bin den e ocasion aki cu ta haci e bishita aki hopi special, cu ta princess Amalia, princess van Oranje, e princess heredero y proximo Reina cu ta bishita Aruba pa prome biaha y esey ta motibo pa e Comision haci su extra esfuerzo pa percura pa tur cos ta bunita y nechi dentro di tur e posibilidadnan cu tin y esaki ta e oportunidad pa haci un bon prome impresion na Princess Amalia. Cada medio di prensa presente a haya un buki cu ta duna un bista general di e programa.
E Famia Real mesora cu yega Aruba ta bay di biaha pa Wilhelmina Park, na unda e parti gubernamental ta bay cuminza. Esta, e “bestuurs moment” y Aruba ta e unico Isla unda tin e parti protocolar cu tur e honornan militar, etc., despues nan ta bay na Gobernador y seguidamente ta bay Staten. Esaki ta durante e prome mainta. Atardi nan ta bay San Nicolas unda lo haci hopi enfasis riba historia unda nan lo wak e historia economico di Aruba, y con hasta den temponan dificil, mescos cu awo, e Arubiano a sa di sali dilanti. Esaki lo ta e mensahe cu lo bin dilanti na San Nicolas. E parti aki lo termina dilanti di Nicolas Store cu ta un Monumento bunita unda lo comparti cultura hubenil cu e Famia Real, y cu lo termina cu un show di carnaval na encargo di hobennan. Di aki nan ta bay Savaneta y lo subi e boto di Kustwacht pasando full e costa di Aruba, pa nan wak e isla for di otro angulo y esaki ta algo priva. Esaki ta un parti di e programa cu Nicole Hovertsz a repasa cu prensa pa e dia di awe.
