ORANJESTAD (AAN) – Den entrevista cu DIARIO, e director di AHATA, señora Tisa LaSorte, a referi na e aumento di BBO riba cambernan di hotel y su consecuencia si bira demasiado caro, y tambe na e urgencia pa
gobierno baha e tarifanan di awa y coriente, como prioridad pa trece alivio den e comunidad.
LaSorte a comenta mester corda cu no solamente camber a bira mas caro, pero tur cos na Aruba a bira mas caro pero loke ta pasa cu e cambernan di hotel ta cu e ta algo unico y si yega na un nivel cu ta bira mucho caro y e turista ta bisa cu e no ta pag'e mas, e ora ey e hotel mester cuminza baha prijs, pasobra asina un mercado liber ta traha.
Esaki ta pone presion riba e entrada di e compania, cu mientras tanto su otro gastonan tambe a subi. Mientras tanto tin presion tambe di e empleadonan cu ta sinti e presion financiero pasobra nan cuentanan den nan cas tambe a bira mas halto.
PRIORIDAD PA COMUNIDAD:
LaSorte a indica cu AHATA ta sigui ofrece dialogo y participacion y sugerencianan y esun di mas urgente actualmente, ta pa yuda tur persona riba nos Isla, cu ta baha e prijs di utilidadnan bek, kiermen awa y coriente, cu ta e prome prioridad, pa trece alivio den nos comunidad.
