Francis Saladin a trece dilanti
- Sugerencia pa elimina BBO pa tur cos den Canasta Basico
- Den algun caso DIMP lo bay gana mas placa cu e comerciante mes
ORANJESTAD (AAN): Comunidad ta mirando prijs di beleg a subi, prijs di manteca a bay halto, prijs di azeta ainda ta hopi halto. Hopi ta puntra ta con e lo ta bay bira aki algun luna ora cu December yega...
Esey ta algo cu Francis Saladin, miembro di directiva di “Comerciantenan Uni Aruba” (CUA) tambe a duna comentario al respecto. E grupo di CUA a wordo lanta for di preocupacionnan di e desaroyo- y intencionnan di Gobierno riba tereno di economia cu por tin efecto riba comercio en general.
Saladin a indica cu comerciantenan tambe ta hopi preocupa, mirando cu December venidero lo bay ta un temporada cu gastonan hopi mas halto, pues ta premira cu benta lo bay ta hopi menos compara cu normal.
Idea pa cu Canasta Basico: Aunke hopi ta agrega cu ta bon mes cu Turismo a logra di bin bek y sobrepasa e nivel pre-pandemia, toch asina mes bo no ta sinti cu pueblo tin e placa pa gasta. Ta parce cu cartera di comunidad a wordo secuestra.
Pero kico ta un bon recomendacion pa yuda comunidad den tempo dificil aki? Saladin a comparti su pensamento, cu lo ta ideal si sigui enfoca riba Canasta Basico pa yuda comunidad, e ora que hubo elimina e cobranza di BBO pa tur e productonan hinca den e Canasta ey.
E ta hasta bay mas leu, pa sugeri pa elimina e BBO na Frontera pa tur producto cu ta bay cay automaticamente den e Canasta Basico. E ora lo bo mantene e productonan ey na un prijs aun mas abao pa pueblo.
Pasobra aworaki, kizas bo tin un fruta den Canasta Basico cu no ta paga impuesto di importacion (‘invoerrechten’), pero e fruta ey ta paga 14% di BBO. Esey ta hopi placa mes! Den cierto casonan, DIMP ta bay gana hopi mas placa compara cu e comerciante mes!
Lista publica den corant: Hopi cliente ultimo tempo ta kehando con prijsnan ta varia asina hopi di negoshi pa negoshi na Aruba. Un bleki di soseishi na un lugar ta 1,20 Florin, y otro lugar e ta riba di 2,05 Florin pa uno. Kizas ta trabao di Gobierno pa controla esaki of e ta free enterprise.
Na opinion di Francis Saladin, semper el a gusta e idea di e lista cu Departamento di Asuntonan Economico ta publica den corant, di e lista di prijs di diferente producto na varios Supermarket rond di Aruba.
Realidad ta cu cada Supermarket tin un protocol diferente (“margen di ganashi”), y awendia e comerciante no por bay bende producto mas caro, pasobra aworaki tin hopi competencia.
Saladin ta reta cualkier persona pa lanta un compania y purba di importa galiña of otro producto, y mesora lo bo ripara cu bo no por bende nan na prijs caro debi cu tin hopi competencia.
“Na Aruba nos tin costumber caba di shop rond,” Saladin a bisa, referiendo aki na e hecho cu hendenan ta core rond pasa diferente supermarket cu semper tin cierto producto cu mihor prijs pe. E cultura di Aruba ta parti di esey caba, esta cu clientenan ta “shop rond”. Realidad ta cu pa e Supermarket tambe, e cambio aki no ta mucho claro.
“Debi cu DIMP ainda tin e desconfiansa ey, nos tur tin miedo cu e BBO na Frontera ey nos ta page adelanta y si acaso nos lo bay hay’e bek of no, kico lo tey pasa,” Saladin a bisa. Anto ora bo tin incertidumbre, e comerciante tambe kier ta sigur cu e tin placa fin di luna pa e por paga su gasto y su salarionan, coriente, awa, y banco.
Pa dia- y simannan venidero, grupo di CUA lo bay pidi Gobierno y tambe DIMP pa un reunion pa asina delibera y mira ki consecuencia e cambio di ley di BBO na Frontera ta, y con por maneh’e lo mas prudente posible.
