Minister Geoffrey Wever:
*Cu e 'inkoopwaarde' a subi, esey ta un otro storia...
ORANJESTAD (AAN): Minister Geoffrey Wever a indica cu ora cu BBO na frontera a drenta na vigor, hopi hende a bisa cu e productonan den e canasta basico tambe a subi di prijs. El a laga sa cu esaki no ta asina.
A remarca cu e prijs di e productonan cu ta den e canasta basico (macuto di compras) ta wordo stipula door di Ministerio di Asuntonan Economico cada dos siman. Pa loke ta BBO na frontera, esaki no a trece ningun cambio den e prijs di e productonan den e canasta basico, e mandatario a remarca.
El a sigui bisa cu na final di dia esey ta e prijs cu por calcula y esey ta e prijs maximo di e producto den e canasta basico cu ta keda identico. Si e 'invoerwaarde' di e producto a subi, por ehempel di sucu, si diripiente door di prijs di sucu internacional e 'inkoopwaarde' di sucu na Aruba subi, e ora door di e sistema e ta subi na final, a splica. Pero no ta door di BBO na frontera el a subi.
Minister Wever a agrega cu esaki ta cosnan riba cual tin hopi discusion andando y no tur ora e informacionnan tabata corecto. Pero tur e productonan den e canasta basico no a subi door di introduccion di BBO na frontera.
"E 'inkoopwaarde' a subi, esey ta un otro storia cu si por tin como consecuencia cu e productonan a subi un poco", a señala.
