Aumento substancial di ‘transaction fee’ riba comerciantenan
- Comerciantenan Uni ta notificando comercio y pueblo
- Atrobe ta prefera pa tur hende cana atrobe rond cu placa cash
ORANJESTAD (AAN): Comerciantenan na Aruba a haya shock e siman aki, ora nan a wordo informa via di e organizacion di Comerciantenan Uni Aruba (CUA) cu tur banco local ta prepara pa hisa e “transaction fee” cada biaha cu un cliente usa nan POS-Machine pa asina swipe of PIN pa haci compras.
Dialuna mainta caba, Frans Ponson di Comerciantenan Uni Aruba a bati alarma no djis pa notifica e comerciantenan local di loke ta bay socede, pero alavez pa informa consumidornan pa nan ta na altura kico e domino-effect di tur esaki lo bay ta pronto!
“Nos kier informa tur Comerciante pa bay haci investigacion, y informa pueblo di biaha kico lo bay ta e consecuencia,” Ponson a declara.
Tin dos tipo di carchi di banco ta wordo uza na Aruba, esta e ‘Credit Card’ y tambe e ‘Debit Card’. Credit Card ta en corto un fiamento di placa, y ora di usa nan pa paga na Comerciante, e “transaction fee” ta grandi.
Pueblo semper a traha cu placa cash ora di haci compras, paga pa servicio di Gobierno, etc. Sinembargo Gobierno y Banconan a logra convence comunidad pa cuminsa uza carchi, pasobra tin mas control, etc.
Asina pues tin un ‘Debit Card’ cu tey pa wordo uza pa paga na POS-Machine di negoshi. E consumidor tin nada di gasto ora di paga na Cashier, pero pa comerciante si tabatin poni cu tin un gasto chikito pa e procesamento. Y tur hende tabata usa carchinan.
A resulta awor cu MasterCard a cumpra ‘Maestro’ y a sac’e afo. Awor pues tin MasterCard Debit y tambe Visa Debit.
“Debi cu e companianan internacional aki ta envolvi nan mes awor cu hasta e Debit Card local di pueblo di Aruba, awor a bin un ‘Fee’ considerablemente mas halto. Ta asina cu hopi negoshi tabata wordo cobra pa varios luna caba, sin cu e Comerciantenan tabata sa cu e ‘Fee’ aki a subi drasticamente. Pasobra e ta hopi complica pa Comerciantenan controla e cobranza debi na e sistema di Banco con e ta wordo haci. Nan ta duna bo tur e placa, y despues ta cobra bo e ‘Fee’,” Ponson a bisa.
“E fee aki a subi considerabelmente y ningun hende no a tende nada. Diripiente siman pasa un banco a manda un carta rond bisando cu e Fee na su carchi di su banco, e ta bay cobra bo na 0.5%, pero cualkier carchi di otro Banco sea local of otro di Aruba, e ta bay cobra bo 2,0%,” e president di CUA a declara. “Mi a compronde cu cierto banco ta cobra hasta mas!”
Segun Ponson, awor na 2024 cu bo ta kere cu un compania cu hopi Cashier lo bay tin mester di yen di POS-Machine... kizas e lo mester bay tin extra 4 pa 5 machine di cada Banco pa purba scapa di e fee ey. E lo ta imposibel. Pasobra si acaso den futuro tin 8 diferente Banco na Aruba... e comerciante lo bay tin mester di 8 diferente POS-Machine na cada cashier.
Tur lo paga mesun fee halto: Algo cu Frans Ponson di CUA a anuncia manera un donderboos grandi, ta cu den su reunion recien cu Banco, e ehecutivonan a bis’e cu entrante 2025, ni maske cu bo bin cu carchi di bo mesun banco, usando e POS-Machine di nan tambe lo bo bay paga e fee halto aki.
Ultimo dianan aki, a bay revisa tur carchi cu a tap of PIN na POS-Machine di negoshinan di Ponson y di otronan, a bin descubri cu ya ta cobrando 2% di transaction-fee. Tin algun unda a cobra mas porciento di fee tambe caba.
Un fee di 0,5% cu subi bira 2,0% nifica cu el a subi 4X pa comercio. “Pueblo ta suficiente inteligente pa sa kico esaki nifica,” Ponson a subraya.
Tur hende por corda par di luna pasa ora cu tur Gasoline Station diripiente a stop di acepta carchinan di banco y indica cu ta acepta placa cash so. El a wordo resolvi, debi cu Gobierno a bay negocia cu e operadornan di Gasoline Station, y a hinca e ‘transaction fee’ aki den e prijs di gasolin, y asina a yega na solucion. Pues pueblo ta pagando gasto di di ‘transaction fee’ den nos gasolin. Gobierno tabata sa di esaki, y e Gasoline Station tambe, debi cu nan ganashi riba benta di combustibel ta masha poco. Pa nan, e transaction fee di 2,0% lo ta inhustificabel.
Mesora Ponson ta pidi Gobierno pa atende cu tur Supermarket cu tambe ta haya e fee halto aki, pa evita cu Canasta Basico ta bira dificil pa sostene.
Decision di Comercio: Segun Ponson, awor Comercio tin di bay reuni riba e aumento drastico inespera aki pa dicidi kico ta bay haci pa atende e aumento substancial di e transaction fee aki.
“Nos ta bay lanta tur prijs cu 2 porciento, y si bo paga cash lo bo haya 2% di descuento. Of ta laga e prijs manera e ta, y si bo bin paga cu Debit Card, lo bay cobra bo 2% extra pa cubri e gasto,” Ponson a bisa den forma di hipotesis.
“Imaginabo na unda nos ta bay,” Ponson a bisa. Nan ta premira cu hopi negoshi lo bay elimina e POS-Machine pa asina no acepta ni Credit Card ni Debit Card mas. Lo bay bek na comunidad di ‘Cash is King’, unda ta acepta placa di papel so.
Bayendo bek pa acepta placa efectivo solamente ora di bende productonan, den weekend por a nota cu tin varios comerciante na Aruba cu ya a stop di uza POS-Machine pasobra nan no kier sigui paga e fee exorbitante aki mas.
Ponson a duna ehemplo con na otro paisnan tin ley pasa cu ta pone un blafon pa cu e limite di ‘fee’ cu por cobra ora di paga cu Debit Card. Asina ta proteha e consumidor y e comerciante.
Segun e president di CUA, si bo uza bo Debit Card pa cumpra algo na Aruba, e comerciante ta haye ta paga 2% di fee. Pero si bo cumpra algo online di compania Mericano y paga cu Debit Card, ey si e negoshi no ta paga e fee halto ey, debi cu ley ta valido riba e transaccion ey.
Politiconan tuma nota! Aworaki Aruba ta den campaña, y ta momento ideal pa politiconan riba e isla informa nan mes riba e asunto aki, como cu e aumento substancial di transaction fee diripiente lo bay hisa prijs di Canasta Basico, y tambe tur otro producto. E lo ta empuhando un inflacion cu ningun hende ta desea e momento aki.
