Directora di DIMP, Luenne Gomes-Pieters
ORANJESTAD (AAN) – Directora di Departamento di Impuesto (DIMP), Luenne Gomes-Pieters a elabora den entrevista cu DIARIO, tocante loke e comerciantenan mester specifica riba factura di compra di producto door di e consumidor.
El a comenta cu na aña 2018 a bin un cambio den ley y a surgi discusion si loke ta wordo cumpra mester bin riba e factura of den e prijs.
Gomes-Pieters a bisa cu enberdad, ora cu a introduci e BAVP a haci tambe un cambio den ley cu ta obliga e comerciantenan pa pone e BBO den e prijs. Kiermen, si e consumidor ta cumpra algo y ta mira un prijs riba e shell, na momento cu e yega caha e mesun prijs cu el a wak, e mesun suma mester paga.
“Antes tabata tin un discusion cu mi ta wak un prijs riba shell di 100 florin, ora mi yega caha e 7% ta wordo suma riba esey y mi tin cu paga adicionalmente e 7% cu mester añadi. E rekisitonan pa un recibo, kico mester wordo poni riba dje ta poni den ley. Eigenlijk, e ley cu ta regla tur cos cu ta cobranza, administracion cerca un negoshi, kico ta e derechonan di e contribuyente, kico ta un obligacion di e contribuyente, kico ta obligacion di Departamento di Impuesto, pasobra nos tin hopi obligacion tambe den ley, ta yama ‘Algemene Landsverordening Belasting (ALB)’ eyden ta poni cu ora un comerciante ta saca un factura mester un fecha, e mester tin un specificacion di kico ta e producto cu a wordo cumpra, kico ta e prijs, y tambe su persons number, e nomber di e negoshi, y hasta e number di KvK mester ta riba e recibo.
“Kizas hopi hende ta pensa cu DIMP no ta controlando, pero te cu Luna di September y October, nos tin casi cien control di buki di nos comerciante of contribuyentenan, unda cu nos ta mira diferente deficiencia den nan administracion of den e suma cu nan mester declara na BBO, y no tur ora e recibo ta wordo duna na e contribuyente of clientenan cu ta cumpra den un negoshi; nan no ta haya un recibo pero solamente e papel di banco cu nan a paga, pero no un specificacion di kico a paga. Esey por ta un señal cu e administracion di e negoshi ey no ta up to date di loke bo a bende y loke bo a resta na final”, Luenne Gomes-Pieters a declara.
