Frans Ponson di Comerciantenan Uni
ORANJESTAD (AAN): Den e epoca nobo aki, e meta di tur comerciante na Aruba ta pa busca forma pa baha gasto. Esey ta loke Frans Ponson, kende ta Presidente di e organizacion “Comerciantenan Uni Aruba” (CUA) a indica den un entrevista.
“Nos tin di wak pa e gastonan no bay fo’i man, pa nos manten’e den linea,” Ponson a indica. “Pero awor e situacion cu nos ta wak aki entre e ley di RAft y e LAft, si nos pais no firma e Rijkswet, ta haya un 30 miyon extra.”
E organizacion CUA a haci un calculacion rapido, y e debe extra aki lo nifica cu cada cas na Aruba esey ta igual cu un debe di interest di 800 Florin pa cada hogar. Esey ta extra debe riba cabez di tur hende, si acaso Aruba no firma e Rijkswet.
Ponson a bisa cu esnan di CUA, como comerciante ta di opinion cu nan tin di haya clarificacion riba esaki, pa sa di con Gobierno lo no firma un cos asina siendo cu lo bay scapa hopi miyones, cu ta bay pone un extra peso riba cada famia di Aruba.
“Aworaki nos no tin tur e detayenan ey, pasobra nos no ta Gobierno, y e unico cos cu nos ta tende ta cu e isla lo perde su autonomia, y nos como comerciantenan kier haya sa kico esey kiermeen,” Ponson a bisa.
“Kico ta nos autonomia, pasobra cualkier comerciante cu a wordo puntra, ningun po splicacion kico nan kiermeen cu autonomia.”
Ponson a bisa cu te asina leu cu nan a compronde, ta cu e Parlamentarionan lo bay tin menos cos di bisa unavez RAft drenta na vigor, y a base di esey ta bisando cu Aruba lo perde autonomia.
Pero asina ta bin e pregunta bek na CUA, ora cu tabatin e proceso di firma contract cu Eagle LNG cu e Parlamentarionan a firma 20 aña pa Aruba sin mira un contract, ey nan a bisa cu “algo ta bon pa Aruba” sin mira e detayenan. E ora CUA kier sa: Ta cua autonomia ta papiando di dje awor anto. Pasobra ya caba ta parce cu Parlamentarionan ta firma loke Gobierno bisa, mescos cu a pasa den gobierno di AVP, mescos ta pasa bao gobierno di MEP.
CUA ta pensa cu tur dos partido grandi ta contra e RAft, pasobra nan tin menos poder pa bulldoze cualkier aprobacion of proyecto di ley den Parlamento.
Gobierno ta cauteloso cu e RAft, y pesey mes Comerciantenan Uni tin gana di haya sa specificamente, ta “con nos lo bay atras mas cu esey”. Segun Ponson, Comerciantenan ta abierto pa tende e splicacion, y a reitera cu nan no tin ningun problema pa na final nan compronde e splicacion y na final sali pa bisa cu nan ta di acuerdo cu Gobierno of no.
