Esnan cu ta cay bao KOR
- E comerciantenan aki no ta haya e declaracion den e portal BO impuesto
ORANJESTAD (AAN): Departamento di Impuesto ta recorda e comerciantenan chikito cu ta cay bao e Areglo pa comerciante chikito of KOR (Kleineondernemersregeling), cu nan no tin mester di entrega e declaracion anual (jaaraangifte) di BBO/BAVP/BAZV mas manera antes.
Entrante aña 2023: Cu implementacion di e Plan di Impuesto 2023 entrante 1 di januari 2023, e comerciantenan chikito cu tin un eenmanszaak y cu tin un volumen di benta di Afl. 50.000 of menos pa aña, pa ley, ta worde exonera y pues no tin e obligacion di haci declaracion y pago di BBO/BAVP/BAZV manera otro comerciantenan.
Tampoco e comerciantenan aki tin mester di haci e declaracion anual (jaaraangifte) di BBO/BAVP/BAZV den luna di januari.
Portal BO impuesto: Debi cu e comerciantenan chikito no tin e deber di haci declaracion di BBO/BAVP/BAZV, nan no ta haya e declaracion mensual den e portal BO impuesto (BOi). Tampoco nan no ta haya e declaracion anual manera antes.
Volumen di benta ta mas cu Afl. 50.000: Na momento cu e volumen di benta (omzet) sobrepasa Afl. 50.000 durante aña, e comerciante chikito tin e obligacion di cuminsa declara y paga BBO/BAVP/BAZV tur luna, desde e luna cu su omzet a sobrepasa Afl. 50.000.
E tin e obligacion di avisa Departamento di Impuesto mesora, pa e por cuminsa haci e declaracionnan tur luna via e portal BO impuesto (BOi). Pa avisa, mester yena un formulario digital via e website:
www.impuesto.aw/belastingmiddelen
Registracion pa BBO/BAVP/BAZV: Departamento di Impuesto no ta registra e comerciantenan chikito pa BBO/BAVP/BAZ tanten cu no tin cambio den e volumen di benta.
E comerciantenan aki ta registra si pa inkomstenbelasting, pa cual nan tin e deber di entrega e cuentanan anual di e empresa ora di haci e declaracion corespondiente.
E comerciantenan chikito (cu tin eenmanszaak) ta worde registra pa BBO/BAVP/BAZV: (*) Ora e volumen di benta di e empresa sobrepasa Afl. 50.000 den un aña. (*) Ora e comerciante chikito - boluntariamente - pidi pa e worde registra en conexion cu deduccion di BBO paga na frontera.
Unabes cu un comerciante chikito worde registra pa BBO/BAVP/BAZV, e tin e deber segun ley di haci declaracion y pago tur luna durante tur e añanan cu ta sigui, no obstante si den un aña e omzet a baha back bou di 50.000 Florin.
