Colombia a detene casa y ex-casa y famianan di e narcotraficantenan di ‘Clan del Golfo’

BOGOTA: Autoridadnan Hudicial na Colombia hunto cu Ministerio Publico, a cuminza traha riba un plan y accion pa por localiza y detene tur e delanteronan di Nélson Darío Hurtado,

mihor conoci como ‘Marihuano’ (a wordo mata den un accion di Polis), y Jorge Eliécer Castaño Toro, conoci como ‘Plastico’ y cu a wordo captura.

   E dos hombernan aki antes tabata personanan clave den e cartel mas grandi di Colombia cu tabata dedica na traficacion di cocaina, esta e ‘Clan del Golfo’.

   Polis a emiti un boletin unda a bisa cu te cu awor nan a ehecuta 12 di e 20 orden di detencion na Medellín, Rionegro, Turbo, Sopetrán, y demas municipionan na Antioquia.

   Esnan cu a wordo deteni, a enriquece nan mes ilegalmente cu mas di US$ 5.5 miyon danki na narcotrafico.

   Pesey mes a start un proceso pa kita di nan e derecho di propiedad di mas di 2.000 cas y lugar, di cual hopi di nan e grupo a bira doño di nan via di tercer persona pa evita di wordo identifica.

   Polis no a menciona su nomber, pero nan a confirma cu nan a detene e prome casa di ‘Marihuano’, kende a yega di ta e di dos persona na mando di e cartel.  Marihuano mes a muri den un accion di Polis dia 7 di Februari di e aña aki den selvanan di Chocó.

   Segun Polis, nan a detene tambe e di dos casa di ‘Marihuano’ y un di su yiu muhernan.

   E boletin ta menciona cu a detene e casa di Jorge Eliécer Castaño (‘Plastico’) kende a wordo captura na Barú como un aña pasa.

   Ademas a detene dos muher mas, cu parce di ta amante di Plastico, y a detene dos ruman homber di Dairo Antonio Usuga David (‘Otoniel’) cu ta cabezante maximo di e Clan del Golfo.

   Den e proceso aki pa haya sa kendenan ta e frontliners di e Clan aki, Polis a logra identifica mas di 120 cuenta di banco cu nan ta usa pa move placa relaciona cu traficacion di droga.  Pesey mes esnan deteni awor ta bay wordo acusa di labamento di placa, enriquecimento ilegal, y tambe di plannan pa comete delincuencia.

   Riba e potretnan aki por mira varios di e propiedadnan cu ta poni riba nomber di ‘Marihuano’ cu a ser poni riba nomber di su famia.  Pero tambe a descubri cu tin 15 finca poni riba nomber di ‘Marihuano’.