Colegio Felipe B. Tromp a presenta e proyecto "Going STEAM" y ta cla pa bishita STEAM Lokaal na Turkia

ORANJESTAD (AAN):  Carina Tromp - van de Poel  na nomber di henter e team di Colegio Felipe B. Tromp, a presenta e proyecto "Going STEAM".

Ultimo añanan, mundialmente ta traha mas y mas na digitalisacion den enseñansa y na e abilidadnan di siglo 21 (21st Century Skills). Esaki ta e
caso tambe cu e scolnan di SKOA.

            Colegio Felipe B. Tromp no ta un excepcion. Tres aña pasa SKOA a duna un di e maestronan e oportunidad pa sigui un curso di Digitale Geletterdheid y awendia juf Isis ta nan DG-Coach. Juf Isis ta encarga cu e proceso y proyectonan di digitalisacion na e scol.

            Den e ultimo 3 añanan a pone Smart tv y chromecast den tur klas y a percura pa cada maestro di klas haya un chroombook. A traha tambe na e habilidadnan di e maestro pa por haci uso di e devicenan
menciona.

            Sondeando posibilidadnan pa expande digitalisacion na nos scol nos a sera conoci cu "STEAM-lokaal". E palabra "STEAM" ta para pa "Science, Technology, Engineering, Art y Math. Pues den e STEAM-lokaal e muchanan lo "traha" riba tareanan specifico, caminda nan ta usa e 5 pilarnan aki pa ehecuta e tarea.

            Asina ta stimula e muchanan pa nan mes desaroya e habilidadnan di siglo 21. Fuera di desaroya e habilidadnan di siglo 21, STEAM ta yuda e muchanan desaroya nan Inteligencia Emocional, nan habilidadnan social ya yuda nan busca solucion, manera nan ta bisa na ingles.

            E muchanan ta siña traha hunto y siña expresa nan mes liber. Durante cu e muchanan ta ehecuta nan tarea nan ta siña di e tarea y nan ta siña di e proceso di ehecuta e tarea. Pues e proceso ta mas importante cu e resultado. Algun di e metanan mas importante di "enseñansa STEAM" ta pa siña e muchanan resolve problema, pensa critico, traha hunto y reflexiona riba tur loke nan ta haci. Pa por logra e metanan aki, e muchanan mester experimenta, observa, analisa y pensa riba posibel solucionnan.

            Como scol a scohe pa crea nan propio STEAM lokaal. Nan ta consciente cu fuera di prepara e lokaal, tin cu prepara e maestronan tambe pa esaki. Enseñansa STEAM ta exigi un otro manera di pensa y un acercamento diferente na e dunamento di les, compara cu loke nos ta haciendo te awor. Pesey mientras cu nos ta traha riba e lokaal, busca device y materialnan necesario, ta traha tambe na prepara e maestronan pa esaki.

            Pesey nan proyecto yama "Colegio Felipe B Tromp going STEAM". E proyecto di SKOA/Erasmus+ a yega net na e momento oportuno. Pa medio di Erasmus+ e maestronan por haya e oportunidad pa experiencia e trahamento den un STEAM lokaal na un scol cu ta mas avansa. Participando activamente den un STEAM-lokaal existente e maestro lo compronde e teoria mas miho.       

         Buscando den e scolnan Europeo cu tin acreditacion di Erasmus+ a haya contacto cu e scol aki y a entrega e proyecto "Going STEAM" na SKOA/Erasmus+.

            E scol kier, na prome lugar felicita SKOA cu e gran logro di haya acreditacion di Erasmus+ pa tur su scolnan. Esaki ta habri porta pa internacionalisacion di su maestronan y cabesantenan y ta duna tur scol di SKOA e oportunidad pa desaroya conocemento y capacidad di su maestronan. No solamente riba e areanan cu Erasmus+ ta ofrece pa participa cu un proyecto pero tambe cerando convenionan cu otro scol na Europa.

            Unabes cuminsa cu intercambio nos hendenan ta amplia nan conocemento riba hopi mas tereno cu solamente e tema en cuestion. Na di dos lugar, kier gradici SKOA pa kere den e proyecto y duna aprobacion pa e proyecto di Erasmus+. Pesey e prome delegacion ta saliendo pa Turkia pa participa den un programa di job shadowing na Yukselen Koleji na Ankara otro siman. E scol aki tin un STEAM-lokaal hopi bishita pa otro scolnan Europeo cu ta bin pa siña con pa set-up un STEAM-lokaal.

            Ta spera di siña hopi for di nan, y cu e conocemento cu nan haya na Turkia lo ta di balor grandi pa sigui cu nan propio STEAM-lokaal.

Tambe ta spera cu e scol aki ta un bon contacto pa SKOA/Erasmus+ y cu den futuro por tin mas intercambio  y tambe cu otro scolnan.

            E prome delegacion ta consisti di 7 participante di Colegio Felipe B. Tromp, 2 participante di Colegio Ora Ubao y 1 participante di directiva di SKOA. Ta invita mas scol y directiva di SKOA pa bay  pero pa diferente motibo fuera di nan alcance no a logra e biaha aki.