Colegio EPI hunto cu La Cabana y Circle K Club a otorga beca na dos alumno

ORANJESTAD (AAN): E tabata un momento di orguyoso, y sigur yen di speranza pa dos hoben studiante! 

DIARIO tabata presente Diabierna mainta na Colegio EPI, pa mira e momento cu oficialmente a haci entrega di un beca na dos studiante di e sector di Horeca.

   E beca aki a bira posible, danki na un iniciativa di La Cabana Beach Resort y e organizacion di studiantenan Kiwanis Circle K di Colegio EPI. 

   Zahaira Kelly a splica e mainta aki, cu Colegio EPI tin hopi aña ta traha cu La Cabana Beach Resort & Casino, y pesey e ta un di e resortnan unda regularmente studiantenan di horeca ta haya chens pa core stage.  Esey nifica cu e contacto entre Colegio EPI y La Cabana ta na un bon nivel.

    E organizacion di Circle K cu tin alumnonan di Colegio EPI como miembro, a bin cu e  iniciativa pa lanza un beca pa asina sostene e studiantenan cu ta sobresali, ta disciplina, y ta entusiasma pa finaliza nan ciclo.  Ora di bin cu e beca, a pone cu esaki ta e puntonan cu e studiantenan tin di cumpli cune, pa por haya esey.

   Y asina e dia a yega pa concretiza e dunamento di beca, y esaki a wordo otorga na dos studiante di Colegio EPI.  El a bira e prome di hopi mas cu lo ta na caminda.

   Colegio EPI ta notando hopi interes keto bay di studiantenan cu kier sobresali den sector di Horeca.  Principalmente nan ta mustrando gran interes riba e tereno culinario, y asina ta nota con anualmente e atencion pa educacion culinario ta birando mas grandi.

   Colegio EPI Sector Horeca ta contento cu e bon cooperacion cu nan tin di hopi decada caba cu La Cabana, y nan ta gradici e General Manager señor Joe Najjar pa e confianza, cu e speranza di lo sigui cu e bon cooperacion.

   Tambe a gradici e Talent Manager di La Cabana, esta señor Sudi Guda.

   Guda a indica cu nan tin un fenomenal contacto y colaboracion cu e organizacion di Circle K di Colegio EPI.  Sin duda alguno un fenomenal cooperacion entre tres grupo, pa asina por cuminza yuda duna beca na alumnonan di Colegio EPI.